ഓമല്ലൂർ : ലൈഫ് പദ്ധതി പ്രകാരമുള്ള വീടിൻ്റെ നിർമ്മാണം പൂർത്തിയാക്കാൻ പണം കിട്ടാത്തതിനാൽ ജീവനൊടുക്കിയ ഓമല്ലൂർ പള്ളം പറയനാലി ബിജു ഭവനത്തിൽ ഗോപിയുടെ കുടുംബത്തെ മുൻ പ്രതിപക്ഷ നേതാവ് രമേശ് ചെന്നിത്തല സന്ദർശിച്ചു. കുടുംബവുമായി സംസാരിച്ച അദ്ദേഹം വിഷയം നിയമസഭയിൽ ഉന്നയിക്കുമെന്ന് ഉറപ്പ് നൽകി. ഗോപിയുടെ മരണത്തിലൂടെ ദു:ഖകരമായ വാർത്തയാണ് കേൾക്കാനായതെന്നും പണം കിട്ടുമെന്ന പ്രതീക്ഷ ഇല്ലാത്തതുകൊണ്ടാണ് ആത്മഹത്യ ചെയ്യേണ്ടി വന്നതെന്നും രമേശ് ചെന്നിത്തല മാധ്യമങ്ങളോട് പറഞ്ഞു.
ലൈഫ് പദ്ധതി പരിപൂർണ്ണമായി താളം തെറ്റിയിരിക്കുകയാണ്. ഗവൺമെൻ്റിന് പദ്ധതി പൂർത്തിയാക്കുന്നതിൽ ഒരു ആത്മാർത്ഥതയുമില്ലന്നും അദ്ദേഹം കുറ്റപ്പെടുത്തി. ലൈഫ് വീടുകൾ പൂർത്തിയാക്കാൻ സർക്കാർ മുൻഗണന നൽകണമെന്നും രമേശ് ചെന്നിത്തല ആവശ്യപ്പെട്ടു. ആൻ്റോ ആൻ്റണി എംപി, ഡിസിസി പ്രസിഡൻ്റ് സതീഷ് കൊച്ചുപറമ്പിൽ, പി മോഹൻരാജ് ,വെട്ടൂർ ജ്യോതി പ്രസാദ്, നഹാസ് പത്തനംതിട്ട,ലിനു മാത്യു,സജി വർഗ്ഗീസ്, തട്ടയിൽ ഹരികുമാർ എന്നിവർ ഒപ്പമുണ്ടായിരുന്നു.
