തിരുവനന്തപുരം : പ്രീ പ്രൈമറി വിഭാഗത്തിലെ ജീവനക്കാരുടെ 2022 ജനുവരി മുതല്‍ മാര്‍ച്ച് വരെയുള്ള ഓണറേറിയം തുക ഇനത്തില്‍ 14 കോടി 88 ലക്ഷം രൂപ അനുവദിച്ചു. അര്‍ഹരായ ജീവനക്കാര്‍ക്ക് ഓണറേറിയം തുക മാറി നല്‍കുന്നതിനുളള നിര്‍ദേശം വിദ്യാഭ്യാസ ഉപഡയറക്ടര്‍മാര്‍ക്ക് നല്‍കി.
പതിനയ്യായിരത്തോളം വനിതകൾ മാത്രം ജോലി ചെയ്യുന്ന പ്രീ പ്രൈമറി മേഖലയിൽ 2861 അധ്യാപകർക്കും 1970 ആയമാർക്കും മാത്രമാണു സർക്കാർ ഓണറേറിയമുള്ളത്. ബാക്കിയുള്ളവർക്കു പിടിഎ നൽകുന്ന തുച്ഛമായ പ്രതിഫലം മാത്രമാണ് ലഭിക്കുന്നത്. നിലവില്‍ ജീവനക്കാരുടെ സേവന ദൈര്‍ഘ്യത്തിന്‍റെ അടിസ്ഥാനത്തില്‍ അധ്യാപകര്‍ക്ക് യഥാക്രമം 12,500 – 12,000 രൂപയും, ആയമാര്‍ക്ക് 7,500 – 7,000 രൂപ നിരക്കിലാണ് പ്രതിമാസ ഓണറേറിയം നൽകുന്നത്.
സംസ്ഥാനത്തെ സര്‍ക്കാര്‍ സ്കൂളുകളോടനുബന്ധിച്ച് അധ്യാപക രക്ഷകര്‍ത്തൃ സമിതികളുടെ നിയന്ത്രണത്തില്‍ പ്രവര്‍ത്തിച്ചുവരുന്ന അംഗീകൃത പ്രീ പ്രൈമറി വിഭാഗത്തിലെ 2861 അധ്യാപകര്‍ക്കും 1970 ആയമാർക്കും ഓണറേറിയം ലഭിക്കുമെന്ന് സർക്കാർ നൽകിയ നിർദേശത്തിൽ പറയുന്നു. അടിയന്തര പ്രാധാന്യത്തോടെ ഫണ്ട് അനുവദിച്ച ധനമന്ത്രി കെ.എൻ. ബാലഗോപാലിന് പൊതുവിദ്യാഭ്യാസ, തൊഴിൽ വകുപ്പ് മന്ത്രി വി.ശിവൻകുട്ടി നന്ദി അറിയിച്ചു.
