ഗുരുഗ്രാം: ഗുരുഗ്രാമിൽ ബുദ്ദോ മാതാ ക്ഷേത്രോത്സവത്തിനിടെ വ്യാജ ശീതളപാനീയം കുടിച്ചതിനെ തുടർന്ന് ദേഹാസ്വാസ്ഥ്യം അനുഭവപ്പെട്ട 28 പേരെ ആശുപത്രിയിൽ പ്രവേശിപ്പിച്ചു. ചൊവ്വാഴ്ച രാത്രിയാണ് സംഭവം. പ്രാഥമിക ചികിത്സകൾ നൽകിയതിന് ശേഷം ഇവരെല്ലാം അപകട നില തരണം ചെയ്തതായി പൊലീസ് അറിയിച്ചു.
സംഭവത്തിൽ ഡൽഹി സ്വദേശിയായ സുശീൽ എന്നയാൾ പൊലീസിൽ പരാതി നൽകിയിട്ടുണ്ട്. ചൊവ്വാഴ്ച രാത്രി കുടുംബാംഗങ്ങൾക്കൊപ്പം ബുദ്ധോ മാതാ ക്ഷേത്രം സന്ദർശിച്ചതായി ഇയാൾ പൊലീസിനോട് പറഞ്ഞു. ഉത്സവത്തിനിടെ 30 വയസുള്ള ഒരാൾ വന്ന് കുടുംബാംഗങ്ങൾക്ക് സൗജന്യമായി ശീതളപാനീയം നൽകി. അരമണിക്കൂറിനുശേഷം ഇവരുടെ അവസ്ഥ വഷളായതിനെ തുടർന്ന് ആശുപത്രിയിൽ പ്രവേശിപ്പിച്ചതായി സുശീൽ പൊലീസിനോട് പറഞ്ഞു.
