നിലമ്പൂർ: മലപ്പുറം മമ്പാട് പൊങ്ങല്ലൂരില് യുവതിയെ ഭര്തൃവീട്ടില് തൂങ്ങിമരിച്ച നിലയില് കണ്ടെത്തി. ഭര്ത്താവിനെ പൊലീസ് കസ്റ്റഡിയിലെടുത്തു. പൊങ്ങല്ലൂര് പൊയിലില് ഷമീമിന്റെ ഭാര്യ സുല്ഫത്തിനെയാണ് (24) മരിച്ച നിലയില് കണ്ടെത്തിയത്.
ബുധനാഴ്ച പുലര്ച്ചെ നാല് മണിയോടെയാണ് സംഭവം. മൃതദേഹം കെട്ടഴിച്ച് നിലത്ത് കിടത്തിയ നിലയിലാണ് നാട്ടുകാര് കണ്ടത്. അതേസമയം, ശരീരത്തില് കയര്മുറുകിയതിന്റെ പാടുകള് ഒന്നും കാണാനില്ലെന്നാണ് പ്രദ്ദേശവാസികളും ബന്ധുക്കളും പറയുന്നത്. സുല്ഫത്തിന്റെ സഹോദരനും പൊങ്ങല്ലൂരിലെ ഇവരുടെ വീട്ടിലുണ്ടായിരുന്നു.
മരണത്തില് സംശയമുണ്ടെന്ന് കാണിച്ച് ബന്ധുവായ സക്കീര് ഹുസൈന് നിലമ്പൂര് പൊലീസില് പരാതി നല്കി. തുടര്ന്നാണ് ഭർത്താവ് ഷമീമിനെ കസ്റ്റഡിയിലെത്തിയത്.
ചുങ്കത്തറ പൂക്കോട്ടുമണ്ണ മുഞ്ഞാക്കല് മുഹമ്മദാലിയുടെയും റസിയയുടെയും മകളാണ് സുല്ഫത്ത്. ഇവര്ക്ക് രണ്ട് കുട്ടികളുമുണ്ട്. നിലമ്പൂര് ജില്ല ആശുപത്രിയിലുള്ള മൃതദേഹം വിരലടയാള വിദഗ്ധരും ഫൊറന്സിക് വിഭാഗവുമെത്തി പരിശോധന നടത്തി. പോസ്റ്റ്മോര്ട്ടത്തിനായി മഞ്ചേരി മെഡിക്കല് കോളജ് മോര്ച്ചറിയിലേക്ക് മാറ്റും.
