രാജ്കോട്ട് > ഇംഗ്ലണ്ടിനെതിരായ മൂന്നാം ടെസ്റ്റിൽ ഇന്ത്യയ്ക്ക് കൂറ്റൻ ലീഡ്. രണ്ടാം ഇന്നിങ്സിൽ 430/4 എന്ന നിലയിൽ ഇന്ത്യ ഡിക്ലയർ ചെയ്തു. തുടർച്ചയായ രണ്ടാം ടെസ്റ്റിലും ഇരട്ടസെഞ്ചുറി നേടിയ യശസ്വി ജയ്സ്വാളിന്റെ 214 (236) തകർപ്പൻ പ്രകടനമാണ് ഇന്ത്യയ്ക്ക് കൂറ്റൻ സ്കോർ സമ്മാനിച്ചത്. ഒന്നര ദിവസം ബാക്കിനിൽക്കെ ഇംഗ്ലണ്ടിന് ജയിക്കാൻ വേണ്ടത് 557 റൺസ്. ശുഭ്മാൻ ഗിൽ 91 (151), അരങ്ങേറ്റക്കാൻ സർഫ്രാസ് ഖാൻ 68 (72) എന്നിവരുടെ പ്രകടനങ്ങളും ഇന്ത്യൻ ഇന്നിങ്സിന് കരുത്തേകി.
പരുക്കിനെ തുടർന്ന് മൂന്നാം ദിവസം റിട്ടയേഡ് ഹർട്ടായി ബാറ്റിങ് അവസാനിപ്പിച്ച ജയ്സ്വാൾ ഞായറാഴ്ച വീണ്ടും കളിക്കാനിറങ്ങുകയായിരുന്നു. അതേസമയം ശുഭ്മാൻ ഗില്ലിന് സെഞ്ചറി നേടാനാകാതെ പോയത് നാലാം ദിനം ഇന്ത്യയ്ക്കു നിരാശയായി. 91 റൺസിൽ നിൽക്കെ ഗിൽ റൺഔട്ടാകുകയായിരുന്നു.
