ന്യൂഡൽഹി ∙ മണിപ്പുർ കാലാപവുമായി ബന്ധപ്പെട്ട് ഐക്യരാഷ്ട്ര സഭയുടെ വിദഗ്ധ സംഘം പുറത്തിറക്കിയ പ്രസ്താവന അനാവശ്യമാണെന്ന് ഇന്ത്യ. യുഎന്നിലെ സ്ഥിരം പ്രതിനിധികൾ പ്രസ്താവന പൂർണമായും നിരാകരിക്കുന്നതായി ഇന്ത്യ വ്യക്തമാക്കി. പ്രസ്താവന അനാവശ്യവും തെറ്റിദ്ധാരണാജനകവും അനുമാനങ്ങൾ വച്ചുള്ളതാണെന്നും ഇന്ത്യൻ പ്രതിനിധികൾ പറഞ്ഞു.യുഎൻ പ്രതിനിധികൾ മണിപ്പുരിലെ സ്ഥിതി മനസ്സിലാക്കിയിട്ടില്ലെന്നും സർക്കാർ സ്വീകരിച്ച നടപടികളെക്കുറിച്ച് അവർക്കു ധാരണയില്ലെന്നും ഇന്ത്യ പറഞ്ഞു. ഇന്ത്യൻ നിയമ സംവിധാനവും സുരക്ഷാസേനയും ആവശ്യമായ എല്ലാ നടപടികളും സ്വീകരിച്ചു വരുന്നതായും അവർ പ്രസ്താവനയിൽ വ്യക്തമാക്കി.
മണിപ്പുർ കലാപത്തിൽ സർക്കാരിനെ വിമർശിച്ചുകൊണ്ട് തിങ്കളാഴ്ചയാണ് യുഎൻ പ്രസ്താവന പുറത്തിറക്കിയത്. വ്യാപകമായി വർഗീയ കലാപവും സ്ത്രീകൾക്കും കുട്ടികൾക്കുമെതിരെ അതിക്രമവും നടക്കുന്നതായി യുഎൻ പ്രസ്താവനയിൽ പറഞ്ഞു. സർക്കാർ നടപടി സ്വീകരിക്കാൻ വൈകുന്നതിനെയും വിദഗ്ധ സംഘം രൂക്ഷമായി വിമർശിച്ചു.മേയ് 3 മുതൽ മണിപ്പുരിൽ നടന്ന കലാപത്തിൽ 163 പേർ കൊല്ലപ്പെട്ടതായാണ് ഔദ്യോഗിക കണക്ക്. 50,000ത്തിലേറെപ്പേർ പലായനം ചെയ്തു. മെയ്തെയ്, കുക്കി വിഭാഗക്കാർ തമ്മിൽ നടന്ന അക്രമത്തിൽ നിരവധി വീടുകൾ കത്തിക്കുകയും, സ്ത്രീകളും കുട്ടികളും ഉൾപ്പെടെ അതിക്രമത്തിന് ഇരയാവുകയും ചെയ്തു.
