കോഴിക്കോട് ∙ വടകര അഴിയൂരില്‍ അഞ്ചുവയസ്സുകാരന് നേരെ ഓട്ടോ ഡ്രൈവറുടെ ക്രൂരത. തുപ്പിയപ്പോൾ ഓട്ടോറിക്ഷയില്‍ പറ്റിയതിന് കുട്ടിയുടെ വസ്ത്രം അഴിപ്പിച്ച് തുടപ്പിച്ചു. മാതാവിന്‍റെ പരാതിയില്‍ ബാലാവകാശ കമ്മിഷന്‍ ഇടപെട്ടതോടെ ചോമ്പാല പൊലീസെത്തി മൊഴി രേഖപ്പെടുത്തി. ഓട്ടോയുടെ പുറത്തേയ്ക്കാണ് തുപ്പിയതെന്നാണ് കുട്ടിയുടെ മൊഴി.
കടുത്ത നടപടി വേണമെന്ന് മാതാവ് പറഞ്ഞെങ്കിലും കുട്ടിയുടെ മാനസിക നില കണക്കിലെടുത്ത് പരാതിയുമായി മുന്നോട്ട് പോകാന്‍ തയാറല്ലെന്ന് അറിയിച്ചു. പരാതി ഇല്ലെങ്കിലും ബാലാവകാശ കമ്മിഷന്‍റെ നിര്‍ദേശം കണക്കിലെടുത്ത് കേസുമായി മുന്നോട്ട് പോകാനാണ് പൊലീസ് ആലോചിക്കുന്നത്.
