കൊച്ചി : സിറ്റി പോലീസിന് ലഭിച്ച രഹസ്യവിവരത്തെ തുടർന്ന് നഗരത്തിൽ നടത്തിയ പരിശോധനയിൽ എം.ഡി.എം.എ. അടക്കമുള്ള മയക്കുമരുന്നുകളുമായി നാലുപേരെ പിടികൂടി. കൊച്ചി പനമ്പിളളി നഗറിൽ ലോഡ്ജിൽ താമസിച്ചിരുന്ന പള്ളുരുത്തി സ്വദേശി പള്ളിയാത്ത് വീട്ടിൽ ജേക്കബ് സച്ചിൻ (23), രവിപുരം സ്വദേശി മാണിക്കത്ത് ക്രോസ്റോഡിൽ കുട്ടേരി വീട്ടിൽ മിഥുൻ മുരളി (22) എന്നിവരിൽനിന്ന് 11.89 ഗ്രാം എം.ഡി.എം.എ.യും 6.835 ഗ്രാം കഞ്ചാവും പിടികൂടി.
ഇവരുടെ സുഹൃത്തുക്കളായ തോപ്പുംപടി പ്യാരി ജങ്ഷനിൽ വലിയപറമ്പിൽ വീട്ടിൽ ആൽബിൻ ജീൻ (23), മുണ്ടംവേലി മുല്ലപ്പറമ്പിൽ വീട്ടിൽ സാൻ ഡെലീഷ്യസ് ജോൺ (24) എന്നിവർ സഞ്ചരിച്ച കാറിൽ നിന്ന് 3.900 ഗ്രാം എം.ഡി.എം.എ.യും പിടികൂടി. ജേക്കബ് സച്ചിനും മിഥുൻ മുരളിയും ഐ.ടി. മേഖലയിലെ ജീവനക്കാരാണ്. കൊച്ചി സിറ്റി ഡി.സി.പി വി.യു. കുര്യാക്കോസിന്റെ നേതൃത്വത്തിൽ എറണാകുളം ടൗൺ സൗത്ത് പോലീസ് ഇൻസ്പെക്ടറും സംഘവും ചേർന്നാണ് പ്രതികളെ അറസ്റ്റ് ചെയ്തത്.
