കോട്ടയം കാഞ്ഞിരപ്പള്ളി ജനറല് ആശുപത്രി വളപ്പില് പാര്ക്ക് ചെയ്തിരുന്ന കാറില് നിന്ന് പണവും പേഴ്സും മോഷ്ടിച്ചയാൾ അറസ്റ്റിൽ. മറ്റൊരു കേസിൽ ജയിൽ ശിക്ഷ അനുഭവിച്ച് പുറത്തിറങ്ങിയ ആളാണ് വീണ്ടും മോഷണം നടത്തിയത്. വണ്ടിപെരിയാര് സ്വദേശി സുരേഷ് ആണ് അറസ്റ്റിലായത്. ചൊവ്വാഴ്ച രാത്രി ഒന്പത് മണിയോടെയായിരുന്നു സംഭവം. പീരുമേട് വണ്ടിപ്പെരിയാർ സ്വദേശി ഹെന്റിക്സിൻറെ കാറിന്റെ ഡോറിൻറെ ചില്ല് അടിച്ച് പൊട്ടിച്ചാണ് സുരേഷ് മോഷണം നടത്തിയത്.
രാത്രി ഒന്പതോടെ ഹെന്റിക്സ് കാറിന്റെ സമീപത്ത് എത്തിയപ്പോഴാണ് മോഷണ വിവരം അറിയുന്നത്. തുടര്ന്ന് എയ്ഡ് പോസ്റ്റിലെ എ. എസ്.ഐ. സന്തോഷ് കുമാറിനെ വിവരം അറിയിച്ചതിനെ തുടര്ന്ന് മോഷ്ടാവിനായി തിരച്ചില് ആരംഭിക്കുകയായിരുന്നു. ഓട്ടോ റിക്ഷാ തൊഴിലാളികള് നല്കിയ വിവരത്തിന്റെ അടിസ്ഥാനത്തില് ഈ സമയത്ത് പൊന്കുന്നത്തേക്ക് ഒരാള് ഓട്ടം വിളിച്ചതായി കണ്ടെത്തി. പൊന്കുന്നത്ത് നടത്തിയ അന്വേഷണത്തില് ഒരാള് ബാറില് നിന്ന് മദ്യപിച്ച് പോയിട്ടുണ്ടെന്നും വിവരം ലഭിച്ചു. പിന്നീട് നടത്തിയ അന്വേഷണത്തില് കുന്നുംഭാഗത്തെ വെയിറ്റിങ് ഷെഡില് സംശയാസ്പദമായ നിലയില് വണ്ടിപ്പെരിയാർ ഡൈമക്ക് നിവാസിയായ സുരേഷിനെ കണ്ടെത്തുകയായിരുന്നു.
ഇയാളുടെ ഭാര്യ ആശുപത്രിയില് ചികിത്സയിലുണ്ടായിരുന്നു. ഭാര്യയോട് വിവരങ്ങള് തിരക്കിയ ശേഷം ഇയാളെ കൂടുതല് ചോദ്യം ചെയ്തതോടെ കുറ്റം സമ്മതിക്കുകയായിരുന്നു. രണ്ടാഴ്ച മുന്പാണ് ഇയാള് മറ്റൊരു മോഷണ കേസില് ജയില് ശിക്ഷ അനുഭവിച്ച ശേഷം പുറത്തിറങ്ങിയതെന്നും പൊലീസിന് വിവരം ലഭിച്ചു. ഇയാളില് നിന്ന് ബാറില് കൊടുത്ത തുകയുടെ ബാക്കിയായ 1500 രൂപയും രേഖകളടങ്ങിയ പേഴ്സും കണ്ടെത്തി. 500 രൂപ മാത്രമാണ് ഇയാളുടെ കൈവശമുണ്ടായിരുന്നതെന്ന് ഭാര്യ പൊലീസിനെ അറിയിച്ചിരുന്നു.
