തിരുവനന്തപുരം: സിപിഎം സംസ്ഥാന സമ്മേളത്തിൽ അവതരിപ്പിക്കേണ്ട കരട് റിപ്പോർട്ടിനു സംസ്ഥാന സെക്രട്ടേറിയറ്റിന്റെ അംഗീകാരം. കഴിഞ്ഞ നാലു വർഷത്തെ രാഷ്ട്രീയ- സംഘടനാ പ്രവർത്തനം വിലയിരുത്തുന്ന റിപ്പോർട്ടിനു രണ്ട് ഭാഗങ്ങളാണുള്ളത്. സർക്കാരിന്റെ ഭാവി പ്രവർത്തനങ്ങൾ സംബന്ധിച്ചു നേരത്തേ തയാറാക്കിയ രേഖ പുതുക്കി റിപ്പോർട്ടിൽ ഉൾപ്പെടുത്തി.
പരിഹരിക്കേണ്ട സംഘടനാ പ്രശ്നങ്ങൾ ബാക്കിയെന്ന് റിപ്പോർട്ടിലുണ്ട്. വിഭാഗീയത അവസാനിച്ചു, എന്നിട്ടും ചില ജില്ലകളിൽ പ്രശ്നങ്ങൾ അവശേഷിക്കുന്നെന്ന് കരട് റിപ്പോർട്ടിൽ പരാമർശിക്കുന്നു. ആലപ്പുഴ, പാലക്കാട് ജില്ലകളിലാണു സംഘടനാ പ്രശ്നങ്ങൾ നിലനിൽക്കുന്നത്. കരട് റിപ്പോർട്ട് നാളെ ആരംഭിക്കുന്ന സംസ്ഥാന സമിതി യോഗത്തിൽ അവതരിപ്പിക്കും. ചർച്ചയ്ക്ക് ശേഷം സമിതി റിപ്പോർട്ടിന് അന്തിമ രൂപം നൽകും.
