തൃക്കാക്കര> കൊച്ചി മെട്രോയുടെ കാക്കനാട് ഇൻഫോപാർക്ക് പാതയിലെ ഏഴ് സ്റ്റേഷനുകളുടെ നിർമാണത്തിന് സ്ഥലമേറ്റെടുക്കാൻ വിജ്ഞാപനമായി. സ്ഥലമേറ്റെടുക്കുന്നതിൽ തർക്കമുള്ള പടമുകൾ, ചെമ്പുമുക്ക് സ്റ്റേഷനുകൾ ഒഴിവാക്കിയാണ് വിജ്ഞാപനം ഇറങ്ങിയത്. പടമുകൾ സ്റ്റേഷൻ റദ്ദാക്കരുതെന്ന് ആവശ്യപ്പെട്ട് വാർഡ് കൗൺസിലർമാരും സിപിഐ എം ലോക്കൽ കമ്മിറ്റിയും കലക്ടർക്ക് കഴിഞ്ഞദിവസം നിവേദനം നൽകിയിരുന്നു.
പാലാരിവട്ടം, ബൈപാസ്, വാഴക്കാല, കാക്കനാട്, സെസ്, ചിറ്റേത്തുകര, രാജഗിരി എന്നിവിടങ്ങളിലെ സ്റ്റേഷൻ നിർമാണത്തിനുള്ള സ്ഥലമെടുപ്പാണ് ഇപ്പോൾ നടത്തുന്നത്. സെസിനുമുന്നിലെ സ്റ്റേഷൻ നിർമാണം തുടങ്ങി. കാക്കനാട്, ചിറ്റേത്തുകര സ്റ്റേഷനുകളാണ് ഉടൻ നിർമാണം ആരംഭിക്കുന്നത്. ഏഴിടത്തായി 3.90 ഏക്കർ സ്ഥലമാണ് മെട്രോ റെയിൽ സ്റ്റേഷൻ നിർമാണത്തിനാവശ്യം. സ്ഥലമെടുപ്പിനുമുന്നോടിയായുള്ള സാമൂഹിക പ്രത്യാഘാതപഠനം നേരത്തേ പൂർത്തിയാക്കിയിരുന്നു.
