തിരുവനന്തപുരം> മുഖ്യമന്ത്രിയുടെ ഇഫ്താര് വിരുന്നില് പങ്കെടുത്ത ലോകായുക്തയും ഉപലോകായുക്തയും ജഡ്ജിമാരുടെ പെരുമാറ്റച്ചട്ടങ്ങള് ലംഘിച്ചു എന്ന ആരോപണം അടിസ്ഥാന രഹിതമെന്ന് ലോകായുക്ത. പത്രക്കുറിപ്പിലൂടെയാണ് ലോകായുക്ത വിശദീകരണം നല്കിയത്.
1997 മെയ് 7 ന് സുപ്രീം കോടതി ജഡ്ജിമാരുടെ യോഗം അംഗീകരിച്ച ‘Restatement of Values of Judicial Life’ ജഡ്ജിമാര്ക്കുവേണ്ടിയുള്ളതാണ്; മുന് ജഡ്ജിമാര്ക്കുവേണ്ടിയുള്ളതല്ല. മാത്രവുമല്ല, അതിലെ പത്താം ഖണ്ഡികയില് പറയുന്നത് ‘a judge shall not accept gifts or hospitality except from his family, close relations and friends’എന്നാണ്.
പ്രസ്തുത – hospitality യില് അഥവാ ആതിഥ്യ’ത്തില് ഗവര്ണറുടെയും മുഖ്യമന്ത്രിയുടെയും ഔദ്യോഗിക വിരുന്നു സല്ക്കാരം ഉള്പ്പെടുകയില്ലെന്നു സാമാന്യബോധമുള്ളവര്ക്കെല്ലാം അറിയാം. അഭിഭാഷകര്, ബിസിനസ്സുകാര്, ഇടനിലക്കാര്, തുടങ്ങിയ സ്വകാര്യ വ്യക്തികളുടെയും, കമ്പനികളുടെയും, വിദേശസര്ക്കാരുകളുടെയും ഏജന്സികളുടെയും ആതിഥ്യം ജഡ്ജിമാര് സ്വീകരിക്കരുത് എന്നാണ് ഉദ്ദേശിച്ചിട്ടുള്ളതെന്നും ലോകായ്ക്ത പത്രക്കുറിപ്പില് വ്യക്തമാക്കി
ദുരിതശ്വാസ നിധി വകമാറ്റല് സംബന്ധിച്ച കേസില് മാധ്യമങ്ങളിലെ വ്യാജ വാര്ത്തയ്ക്കെിരെയും ലോകായുക്ത പത്രക്കുറിപ്പില് വിമര്ശനമുന്നയിച്ചു.
ലോകായുക്തയുടെ പരിഗണനയിലുള്ള വിവാദമായ ഒരു കേസിലെ ആരോപണം മുഖ്യമന്ത്രിയും സഹമന്ത്രിമാരും ഉള്പ്പെടുന്ന മന്ത്രിസഭ മുഖ്യമന്ത്രിയുടെ ദുരിതാശ്വാസനിധിയില് നിന്നും അര്ഹതയില്ലാത്തവര്ക്ക് ക്രമരഹിതമായി ധനസഹായം അനുവദിച്ചു എന്നാണെന്നും മുഖ്യമന്ത്രിയോ സഹമന്ത്രിമാരോ ദുരിതാശ്വാസനിധിയില് നിന്ന് പണം അപഹരിച്ചു സ്വന്തമാക്കിയെന്നല്ലെന്നും ലോകായുക്ത പറഞ്ഞു
