തിരുവനന്തപുരം> കേരളത്തിന് ഏറ്റവും കൂടുതൽ സാധ്യത വരാൻ പോകുന്നത് ഭക്ഷ്യസംസ്കരണമേഖലയിലാണെന്ന് വ്യവസായ മന്ത്രി പി രാജീവ്. ഈ രംഗത്ത് സംസ്ഥാനം കുതിപ്പിലാണ്. ലോകത്തിന്റെ സുഗന്ധവ്യഞ്ജനങ്ങളുടെ സംസ്കരണത്തിന്റെ ഹമ്പും കേരളമാണ്. സിന്തെയ്ൻ കമ്പനിയുടെ നടപ്പുവർഷത്തെ വിറ്റുവരവ് 3300 കോടി രൂപയാണെന്നും മന്ത്രി പറഞ്ഞു. വൈഗയുടെ ഭാഗമായി സംഘടിപ്പിച്ച ബിസിനസ് മീറ്റ് ഉദ്ഘാടനം ചെയ്യുകയായിരുന്നു അദ്ദേഹം.
ധനകാര്യസ്ഥാപനങ്ങൾ എംഎസ്എംഇകൾക്ക് കൊടുത്ത വായ്പയിൽ ജനുവരി കണക്ക് അനുസരിച്ച് 10000 കോടിയുടെ വർധനവുണ്ടായി. 41000 കോടി രൂപയാണ് വായ്പ നൽകിയത്. സാമ്പത്തികവർഷം അവസാനിക്കാൻ രണ്ടുമാസംകൂടി ബാക്കിയിട്ടുണ്ട്. 2021– 2022 ൽ 31000 കോടിയാണ് ബാങ്കുകൾ ഈരംഗത്ത് വായ്പയായി നൽകിയത്. രണ്ടുമാസത്തിനകം കുതിപ്പു വരാനിടയുണ്ടെന്നാണ് ബാങ്കുകൾ പറയുന്നത്. അങ്ങനെ എങ്കിൽ ഈ വർഷം വായ്പ അറുപതിനായിരം കോടിയാകും.
സംസ്ഥാനത്തിന്റെ വ്യവസായ വളർച്ച 17.3 ശതമാനമാണ്. ഇതാദ്യമായി മാനുഫാക്ച്ചറിങ് മേഖലയുടെ സംഭാവന 18.3 ശതമാനമായി. അതിൽ പ്രധാന സംഭാവന ഭക്ഷ്യസംസ്കരണരംഗമാണ്. അത് ശക്തിപ്പെടുത്തി കൊണ്ടുപോകാനാകും. ബജറ്റിൽ മിഷൻ 1000 പ്രഖ്യാപിച്ചിട്ടുണ്ട്. ഇപ്പോഴുള്ള എംഎസ്എംഇയിൽനിന്ന് സുതാര്യമായ നടപടികളിലൂടെ 1000 എണ്ണത്തെ തിരഞ്ഞെടുക്കുകയും ഇവയിൽനിന്ന് ഒരുലക്ഷം കോടി രൂപയുടെ വിറ്റുവരവ് ലക്ഷ്യമിടുന്നതാണ് പദ്ധതി. മെയ്ഡ് ഇൻ കേരള സർട്ടിഫിക്കേഷനിലൂടെ ഉൽപ്പന്നങ്ങൾ വിപണിയിൽ എത്തിക്കാനുള്ള പദ്ധതിക്ക് സംസ്ഥാനം 1000 കോടി രൂപ നീക്കിവച്ചിട്ടുണ്ട്. ഈ സാധ്യതകൾ കർഷകരും എംഎസ്എംഇകളും പ്രയോജനപ്പെടുത്തണമെന്നും മന്ത്രി പറഞ്ഞു. ചടങ്ങിൽ കൃഷിമന്ത്രി പി പ്രസാദ് അധ്യക്ഷനായി.
