അബുദാബി : ബിഗ് ടിക്കറ്റ് വാരാന്ത്യ നറുക്കെടുപ്പിൽ സൗദിയിൽ ജോലി ചെയ്യുന്ന എറണാകുളം കോതമംഗലം സ്വദേശി അബ്ദുൽ അസീസിന് മൂന്നു ലക്ഷം ദിർഹം (62.42 ലക്ഷം രൂപ) സമ്മാനം. സൗദിഅൽമറായ് കമ്പനിയിൽ ഡ്രൈവറാണ്. അഞ്ചു വർഷമായി തനിച്ചാണ് ടിക്കറ്റെടുക്കുന്നതെന്നും അദ്ദേഹം പറഞ്ഞു. ബിഗ് ടിക്കറ്റിന്റെ ഇലക്ട്രോണിക് ഡ്രോ മാർച്ച് മാസത്തിലെ ആദ്യ ആഴ്ചയിലെ സമ്മാനമാണ് അബ്ദുൽ അസീസിന് ലഭിച്ചത്.
വിവരം അറിയിക്കാൻ അവതാരക വിളിച്ചപ്പോൾ അബ്ദുൽ അസീസിന്റെ സന്തോഷം പ്രകടമായിരുന്നു. ബിഗ് ടിക്കറ്റിൽ നിന്നുമാണ് വിളിക്കുന്നതെന്നും മൂന്നു ലക്ഷം ദിർഹം സമ്മാനമായി ലഭിച്ചുവെന്നും അവതാരക അദ്ദേഹത്തെ അറിയിച്ചു. എന്തു തോന്നുവെന്ന് ചോദിച്ചപ്പോൾ വലിയ സന്തോഷമെന്നായിരുന്നു അദ്ദേഹത്തിന്റെ പ്രതികരണം. എന്താണ് പറയേണ്ടതെന്ന് അറിയില്ലെന്നും അസീസ് പറഞ്ഞു.
ഒറ്റയ്ക്കാണ് ടിക്കറ്റ് എടുത്തത്. രണ്ടു മാസത്തിന് ശേഷമാണ് വീണ്ടും ബിഗ് ടിക്കറ്റിൽ ഭാഗ്യം പരീക്ഷിച്ചത്. ജനുവരിയിലാണ് ഇതിനു മുൻപ് നറുക്കെടുപ്പിൽ പങ്കെടുത്തതെന്നും അബ്ദുൽ അസീസ് പറഞ്ഞു. മലയാളികൾ ഉൾപ്പെടെ നിരവധി ഇന്ത്യക്കാർ ബിഗ് ടിക്കറ്റിൽ വലിയ സമ്മാനങ്ങൾ നേടിയിട്ടുണ്ട്.
