പേരാമ്പ്ര: സംയുക്ത തൊഴിലാളി യൂണിയൻ സമരം നടക്കുന്ന സി.കെ.മെറ്റീരിയൽസിൽ പോലീസിനെ നോക്കുകുത്തിയാക്കി സംയുക്ത തൊഴിലാളി സംഘടനയുടെ ബലപ്രയോഗം. ഇന്നലെ രാവിലെ എത്തിയ ഒരു ലോഡ് സിമന്റ് സ്ഥാപനത്തിലെ ജീവനക്കാരെ തടഞ്ഞു കൊണ്ട് തൊഴിലാളികൾ ബലം പ്രയോഗിച്ച് ഇറക്കുകയായിരുന്നു. പോലീസ് സ്ഥലത്ത് ഉണ്ടായിരുന്നെങ്കിലും തൊഴിലാളികളെ തടഞ്ഞില്ല.
ചരക്കിറക്കിയ ശേഷം സ്ഥാപന ഉടമ സി.കെ.ബിജുവിനെ ഭീഷണിപ്പെടുത്തുകയും സ്ഥാപനത്തിൽ നിന്നും സിമന്റ് എടുത്തു പോയ വാഹനം തടഞ്ഞു വാഹനത്തിലുണ്ടായിരുന്ന ചേനോളി വയലോട്ട് നിസാറിനെ ആക്രമിക്കുകയും ചെയ്തു. കൈയ്ക്കും കഴുത്തിനും പരുക്കേറ്റ നിസാർ ആശുപത്രിയിലാണ്. ഉച്ചയ്ക്കുശേഷം എത്തിയ ലോഡും തൊഴിലാളികൾ ഇറക്കാൻ ശ്രമിച്ചെങ്കിലും പേരാമ്പ്ര പോലീസ് എസ്ഐ കെ.ഹബീബുല്ലയുടെ നേതൃത്വത്തിൽ പോലീസ് എത്തി തടയുകയും കടയിലെ ജീവനക്കാർ ഇറക്കുകയും ചെയ്തു.നിയമ വ്യവസ്ഥയെ വെല്ലുവിളിക്കുന്ന പ്രവർത്തനമാണ് തൊഴിലാളി യൂണിയനുകൾ നടത്തുന്നതെന്ന് ഉടമ സി.കെ.ബിജു പറഞ്ഞു. കോടതിയുടെ ഉത്തരവ് പ്രകാരമാണ് സ്ഥാപനം പ്രവർത്തിക്കുന്നതെങ്കിലും അതു പോലും അനുവദിക്കാത്ത അവസ്ഥയാണെന്നും അദ്ദേഹം പറഞ്ഞു.
