തിരുവനന്തപുരം: കോണ്ഗ്രസ് അധ്യക്ഷ തെരഞ്ഞെടുപ്പിൽ ശശി തരൂരിന് പരസ്യ പിന്തുണ പ്രഖ്യാപിച്ച് യൂത്ത് കോണ്ഗ്രസ് സംസ്ഥാന വൈസ് പ്രസിഡൻ്റ് കെ.എസ്.ശബരീനാഥൻ. 1897-ൽ ചേറ്റൂര് ശങ്കരൻ നായരാണ് അവസാനമായി കോണ്ഗ്രസ് അധ്യക്ഷ സ്ഥാനത്തേക്ക് മത്സരിച്ച് ജയിച്ചതെന്നും 125 വര്ഷത്തിന് ശേഷം കേരളത്തിൽ നിന്നും ശശി തരൂര് ആ പദവിയിലേക്ക് മത്സരിക്കുമ്പോൾ അദ്ദേഹത്തിൻ്റെ നോമിനേഷനിൽ പിന്തുണച്ച് ഒപ്പിടാനായത് അസുലഭ ഭാഗ്യമായി കാണുന്നുവെന്നും കെ.എസ്.ശബരീനാഥൻ ഫേസ്ബുക്കിൽ കുറിച്ചു.
ഗാന്ധിയുടെയും നെഹ്റുവിന്റെയും അംബേദ്കറിന്റെയും കാഴ്ചപ്പാടുകൾ സമകാലിക സാഹചര്യത്തിൽ ഇത്ര വ്യക്തമായി സംസാരിക്കുന്ന മറ്റൊരു നേതാവില്ലെന്നും ശബരീനാഥ് ഫേസ്ബുക്കിൽ കുറിച്ചു. കോഴിക്കോട് എംപി എം.കെ. രാഘവനും ശബരീനാഥനും അടക്കം പതിനഞ്ച് പേരാണ് കേരളത്തിൽ നിന്നും തരൂരിൻ്റെ നോമിനേഷനിൽ പിന്തുണച്ച് ഒപ്പിട്ടത്.
