തൃശ്ശൂർ : അതിരാവിലെ പരസ്യമായി മദ്യവിൽപ്പന നടത്തിയ യുവാവിനെ എക്സൈസ് അറസ്റ്റ് ചെയ്തു. മരത്താക്കര പുഴമ്പള്ളം സ്വദേശി കാഞ്ഞിരത്തിങ്കൽ ഷൈജനാ (39)ണ് പിടിയിലായത്. പുഴമ്പള്ളം, പുത്തൂർ, മരത്താക്കര ഭാഗങ്ങളിൽ കുറച്ച് മാസങ്ങളായി അതിരാവിലെതന്നെ ആളുകൾ മദ്യപിച്ച് ജങ്ഷനുകളിൽ കാണപ്പെട്ടതിനെത്തുടർന്ന് നടത്തിയ അന്വേഷണത്തിലാണ് പ്രതി പിടിയിലായത്. വിൽപ്പന കേന്ദ്രത്തിലേക്ക് തൊഴിലാളികളുടെ വേഷത്തിൽ എത്തിയ എക്സൈസ് ഉദ്യോഗസ്ഥരുടെ കൈയിൽ ഇയാൾ പെടുകയായിരുന്നു. തൊഴിലാളികളുടെ വേഷത്തിലെത്തിയ എക്സൈസ് ഉദ്യോഗസ്ഥർ പണം നീട്ടിയപ്പോൾ ഇയാൾ മദ്യം നൽകി. ഇതോടെ ഇയാളെ കൈയോടെ പിടികൂടി. ഇയാളിൽനിന്ന് നാല് ലിറ്റർ വിദേശമദ്യവും 1700 രൂപയും പിടിച്ചെടുത്തു.
തൃശ്ശൂർ എക്സൈസ് റേഞ്ച് അസി. എക്സൈസ് ഇൻസ്പെക്ടർ സി.യു. ഹരീഷ്, പ്രിവന്റീവ് ഓഫീസർമാരായ കെ.എം. സജീവ്, കെ.വി. രാജേഷ്, സി.ഇ.ഒ.മാരായ വിശാൽ, എൻ.ആർ. രാജു, ബിബിൻ ചാക്കോ, എ. ജോസഫ്, അബ്ദുൾ റഫീക്ക് എന്നിവരടങ്ങിയ സംഘമാണ് സംഘത്തിൽ ഉണ്ടായിരുന്നത്.
