മലപ്പുറം: സ്‌കൂളില്‍ ബോധവല്‍ക്കരണ ക്ലാസ് എടുക്കുന്നതിനിടെ വിരമിച്ച അധ്യാപകന്‍ കുഴഞ്ഞ് വീണ് മരിച്ചു. കാളികാവ് സ്വദേശി ചോലശ്ശേരി കെ ഫസലുദ്ധീന്‍ (63) ആണ് മരിച്ചത്. ആമപ്പൊയില്‍ ജിഎല്‍പിഎസ്ല്‍ കുട്ടികള്‍ക്കും രക്ഷിതാക്കള്‍ക്കും ബോധവല്‍ക്കരണ ക്ലാസ് എടുക്കുന്നതിനിടെ കുഴഞ്ഞു വീഴുകയായിരുന്നു. ഇന്ന് വൈകുന്നേരം 4 ക്ക് ശേഷമാണ് ഫസലുദ്ധീന്‍ ബോധവല്‍ക്കരണ ക്ലാസ് എടുത്തത്. കഥോത്സവം പരിപാടിയുടെ ഭാഗമായിട്ടായിരുന്നു ബോധവത്കരണ ക്ലാസ്. ക്ലാസ് പുരോഗമിക്കുന്നതിനിടെ പെട്ടെന്ന് നിര്‍ത്തി തൊട്ടടുത്ത കസേരയില്‍ ഇരിക്കുകയും കുഴഞ്ഞു വീഴുകയുമായിരുന്നു. കാളികാവിലെ സ്വകാര്യ ആശുപത്രിയിലേക്കുള്ള വഴിമധ്യേയായിരുന്നു മരണം. വണ്ടൂര്‍ വനിത ഇസ്‌ലാമിക് കോളജ് മുന്‍ പ്രിന്‍സിപ്പലും അടക്കാകുണ്ട് ക്രസന്റ് ഹയര്‍ സെക്കന്‍ഡറി മുന്‍ അധ്യാപകനുമായിരുന്നു.
