വണ്ടാനം (അമ്പലപ്പുഴ)> ആലപ്പുഴ മെഡിക്കൽ കോളേജ് ആശുപത്രിയിൽ പ്രവേശിപ്പിച്ച മന്ത്രി കെ കൃഷ്ണൻകുട്ടി ആരോഗ്യനില തൃപ്തികരമായതിനെത്തുടർന്ന് ആശുപത്രി വിട്ടു. വെള്ളി രാവിലെ ഒമ്പതിനാണ് ശാരീരികാസ്വസ്ഥത മൂലം ആശുപത്രിയിലെത്തിച്ചത്. പരിശോധനയിൽ ഹൃദയമിടിപ്പ് കുറയുന്നത് കണ്ടെത്തി. പിന്നീട് മന്ത്രിയെ കാർഡിയോളജി തീവ്രപരിചരണ വിഭാഗത്തിലേക്ക് മാറ്റി.
മെഡിക്കൽ കോളേജ് പ്രിൻസിപ്പൽ മറിയം വർക്കി, സൂപ്രണ്ട് അബ്ദുൾ സലാം എന്നിവരുടെ നേതൃത്വത്തിൽ മെഡിക്കൽ ടീം രൂപീകരിച്ച് സ്ഥിതിഗതികൾ വിലയിരുത്തി. ഹൃദയമിടിപ്പ് നിയന്ത്രിക്കുന്നതിന് പേസ്മേക്കർ ഘടിപ്പിച്ചു. മറ്റ് പരിശോധനകളിൽ ഹൃദയാഘാതമോ മസ്തിഷ്ക സംബന്ധമായ അസുഖങ്ങളോ കണ്ടെത്താൻ കഴിഞ്ഞില്ല. ആരോഗ്യനില തൃപ്തികരമാണെന്ന് ഡോക്ടർമാർ പറഞ്ഞു.
