കൊച്ചി > ബിജെപിക്ക് സർക്കാറുണ്ടാക്കാനുള്ള ഫിക്സഡ് ഡെപ്പോസിറ്റാണ് കോൺഗ്രസ് എംപിമാരെന്ന് മന്ത്രി പി രാജീവ്. തുടർച്ചയായി കോൺഗ്രസിൽ നിന്നുള്ള പല നേതാക്കളും എംപിമാരും ബിജെപിയിലേക്ക് കൂറുമാറുന്നുവെന്നും അടൂർ പ്രകാശിന് 2019ൽ ബിജെപി വോട്ട് മറിച്ചെന്ന വെളിപ്പെടുത്തൽ ഇതാണ് തെളിയിക്കുന്നതെന്നും മന്ത്രി പറഞ്ഞു. ഒരേ സമയം എസ്ഡിപിഐയും ബിജെപിയും ആയി കൂട്ടുകെട്ടുണ്ടാക്കുന്നവരാണ് കോൺഗ്രസ്. അത് മത ന്യൂനപക്ഷങ്ങൾ തിരിച്ചറിയുന്നുണ്ട്.
ബംഗളൂരുവിലെ ഐ ടി സ്ഥാപനങ്ങളെ താൻ കേരളത്തിലേക്ക് ക്ഷണിച്ചതിനെ വിമർശിച്ച കർണ്ണാടക മന്ത്രിക്കുള്ള മറുപടിയും മന്ത്രി പറഞ്ഞു. എല്ലാ സംസ്ഥാനങ്ങളും നിക്ഷേപകരെ ക്ഷണിക്കാറുണ്ട്. അതിൽ ഫെഡറൽ തത്വങ്ങളുടെ ലംഘനമില്ല. കേരളത്തിലേക്ക് ഇനിയും നിക്ഷേപങ്ങൾ ക്ഷണിക്കും. കേരളത്തിലെ അനുകൂല സാഹചര്യങ്ങൾ പ്രയോജനപ്പെടുത്തുകയാണ് ലക്ഷ്യമെന്നും അദ്ദേഹം പറഞ്ഞു
