ലക്നൗ : യു പി നിയമസഭാ തെരഞ്ഞെടുപ്പ് പടിവാതിലിൽ എത്തിനിൽക്കേ ഒരു ഫോട്ടോ സൃഷ്ടിക്കുന്ന പുകിലുകളാണ് ഉത്തർപ്രദേശിൽ നിന്നുള്ള വാർത്ത. സമാജ് വാദി പാർട്ടി നേതാവ് മുലായം സിങ് യാദവും ആർഎസ്എസ് അധ്യക്ഷൻ മോഹൻ ഭാഗവതും ഒരുമിച്ചുള്ള ഫോട്ടോയാണ് കോൺഗ്രസ് രാഷ്ട്രീയ ആയുധമാക്കുന്നത്. മുഖ്യശത്രുവായ ബിജെപിക്കെതിരേ സമാജ് വാദി പാർട്ടിയും കോൺഗ്രസും വെവ്വേറെ പടയൊരുക്കം നടത്തുന്നതിനിടെയാണ് പുതിയ വിവാദം. ഡൽഹിയിൽ ഉപരാഷ്ട്രപതി വെങ്കയ്യ നായിഡുവിന്റെ കൊച്ചുമകളുടെ വിവാഹ സൽക്കാരത്തിൽ പങ്കെടുക്കാൻ എത്തിയപ്പോഴാണ് മുലായം സിങ്ങും മോഹൻ ഭഗവതും കണ്ടതും ഫോട്ടോ എടുത്തതും.
മുലായം സിങ്ങും മോഹൻ ഭാഗവതും ഒരു ഇരിപ്പിടത്തിൽ അടുത്തടുത്തായി ഇരിക്കുന്ന ചിത്രമാണ് പുറത്തുവന്നിരിക്കുന്നത്. കേന്ദ്ര മന്ത്രി അർജുൻ മേഗ്വാൾ മോഹൻ ഭഗവതിൽനിന്ന് അനുഗ്രഹം തേടുന്നതും ചിത്രത്തിൽ കാണാം. അർജുൻ മേഗ്വാൾ തന്നെയാണ് ചിത്രം ട്വീറ്റ് ചെയ്തതും. പിന്നീട് കോൺഗ്രസ് ഈ ഫോട്ടോ ഏറ്റെടുക്കുകയും സമാജ്വാദി പാർട്ടിക്കെതിരേ ഉപയോഗിക്കുകയും ചെയ്തു. പുതിയ എസ്.പി (സമാജ്വാദി പാർട്ടി) യിലെ എസ് അർഥംവെക്കുന്നത് സംഘ്വാദ് എന്നാണോ ? എന്ന് ചോദിച്ചുകൊണ്ട് യു.പി. കോൺഗ്രസ് ഈ ചിത്രം ട്വീറ്റ് ചെയ്തു. തുടർന്ന് ഉത്തർപ്രദേശ് ബിജെപിയും ഈ ചിത്രം ട്വീറ്റ് ചെയ്തു. ഒരു ചിത്രം നിരവധി കാര്യങ്ങൾ പറയുന്നു എന്ന കുറിപ്പിനൊപ്പമായിരുന്നു ചിത്രം പങ്കുവെച്ചത്.
കോൺഗ്രസിന്റെ ആക്രമണത്തിന് മറുപടിയുമായി സമാജ്വാദി പാർട്ടിയും രംഗത്തെത്തി. ഒരു ചടങ്ങിൽനിന്നുള്ള ഫോട്ടോ ഉയർത്തിപ്പിടിച്ച് കോൺഗ്രസ് എത്തിയിട്ടുണ്ട്. അവരുടെ സഖ്യകക്ഷിയായ എൻസിപി നേതാക്കൾ അടക്കമുള്ളവർ നേതാജി ( മുലായം സിങ് ) യിൽനിന്ന് അനുഗ്രഹം വാങ്ങിയിരുന്നു. ഈ ചിത്രം പ്രചരിപ്പിക്കുന്നതിലൂടെ കോൺഗ്രസ് എന്താണ് പറയാൻ ശ്രമിക്കുന്നത്?, കോൺഗ്രസിന്റെ ട്വീറ്റ് മറുപടിയായി സമാജ്വാദി പാർട്ടി ചോദിക്കുന്നു. സമാജ് വാദി പാർട്ടി നേതാവും മുലായം സിങ്ങിന്റെ മകനുമായ അഖിലേഷ് യാദവിനെ ലക്ഷ്യംവെച്ചുള്ള ആദായനികുതി റെയ്ഡുകൾ നടന്ന് രണ്ടു ദിവസത്തിനു ശേഷമാണ് കൂടിക്കാഴ്ച എന്നതും സംഭവത്തിന് പുതിയൊരു മാനം നൽകുന്നു. റെയ്ഡിനു പിന്നാലെ ബിജെപിക്കെതിരേ അഖിലേഷ് യാദവ് രൂക്ഷമായ ഭാഷയിൽ വിമർശനം ഉയർത്തിയിരുന്നു. തിരഞ്ഞെടുപ്പ് മുന്നിൽക്കണ്ടാണ് ബിജെപി ഇത്തരമൊരു നീക്കം നടത്തുന്നതെന്നും അഖിലേഷ് ആരോപിച്ചിരുന്നു.
