കോഴിക്കോട് : സെർവറിലെ സാങ്കേതിക തകരാർ മൂലം ചാത്തമംഗലം എൻഐടിയിൽ യുജിസി നെറ്റ് പരീക്ഷ തടസ്സപ്പെട്ടു. ഇന്നു രാവിലെ നടക്കേണ്ട പരീക്ഷയാണ് തടസപ്പെട്ടത്. സെർവറിലെ തകരാറാണ് പ്രതിസന്ധിക്ക് കാരണമെന്ന് അധികൃതർ വിശദീകരിച്ചു. തുടർന്ന് പരീക്ഷാകേന്ദ്രമായ എൻഐടിക്കു മുൻപിൽ വിദ്യാർഥികൾ പ്രതിഷേധിച്ചു.
യുജിസി നെറ്റ് പരീക്ഷ ഇന്നു രാവിലെ 9 മണിക്ക് തുടങ്ങേണ്ടതായിരുന്നു. 12 മണി വരെയായിരുന്നു പരീക്ഷാ സമയം. ദൂരസ്ഥലങ്ങളിൽനിന്ന് അതിരാവിലെ വിദ്യാർഥികൾ പരീക്ഷാകേന്ദ്രത്തിലെത്തി. രാവിലെ 7.20ന് പരീക്ഷാ ഹാളിൽ കയറിയ വിദ്യാർഥികൾക്ക് ഉച്ചയ്ക്ക് 12 വരെ പരീക്ഷ എഴുതാൻ സാധിച്ചില്ല. തുടർന്ന് ഉച്ചയ്ക്ക് പന്ത്രണ്ടോടെ പരീക്ഷ ആരംഭിച്ചില്ലെങ്കിലും പലർക്കും ചോദ്യങ്ങൾ ലഭിച്ചില്ല. മാത്രമല്ല ലഭിച്ച ചോദ്യങ്ങൾ ഹാങ്ങായിരുന്നെന്നും വിദ്യാർഥികൾ പറയുന്നു.
സെർവറിലെ തകരാറാണ് പ്രതിസന്ധിക്കു കാരണമെന്നാണ് അധികൃതർ പറയുന്നത്. എന്നാൽ സെർവറിലെ തകരാർ മൂലം പരീക്ഷ നഷ്ടപെട്ടതിനാൽ പ്രതിസന്ധി നേരിട്ടവർക്കായി വീണ്ടും പരീക്ഷ നടത്തണമെന്നാണ് വിദ്യാർഥികളുടെ ആവശ്യം. ഓഗസ്റ്റിൽ നടക്കുന്ന നെറ്റ് പരീക്ഷയ്ക്കൊപ്പം തങ്ങളുടെ പരീക്ഷയും നടത്തണമെന്നാണ് വിദ്യാർഥികൾ ആവശ്യപ്പെട്ടത്.
