തൊടുപുഴ : സിപിഎമ്മില്‍ നിന്ന് പുറത്താക്കിയ ദേവികുളം മുന്‍ എംഎല്‍എ എസ്.രാജേന്ദ്രനെതിരെ പ്രാദേശിക നേതാക്കള്‍. മുന്‍ മന്ത്രി എം.എം.മണിക്കെതിരെ രാജേന്ദ്രന്‍ നടത്തുന്ന ആക്ഷേപങ്ങള്‍ അവസാനിപ്പിക്കണമെന്ന് സിപിഎം മൂന്നാര്‍ ഏരിയാ സെക്രട്ടറി കെ.കെ.വിജയന്‍ ആവശ്യപ്പെട്ടു. മൂന്ന് തവണ രാജേന്ദ്രന്‍ ജയിച്ചത് ഇടതുമുന്നണി പ്രവര്‍ത്തകരുടെ അധ്വാനം കൊണ്ടാണെന്നും അതിന്റെ നന്ദി രാജേന്ദ്രന്‍ പാര്‍ട്ടിയോട് കാണിച്ചിട്ടില്ലെന്നും നേതാക്കള്‍ പറഞ്ഞു. പാര്‍ട്ടിയില്‍ ഉണ്ടായിരുന്നപ്പോഴും രാജേന്ദ്രന്റെ പ്രവര്‍ത്തനം തോന്നിയ പടിയായിരുന്നു. പാര്‍ട്ടി അച്ചടക്കം മുന്‍നിര്‍ത്തിയാണ് അന്ന് ഇക്കാര്യങ്ങള്‍ പൊതുമധ്യത്തില്‍ വെളിപ്പെടുത്താതിരുന്നത്. എല്‍ഡിഎഫ് തനിക്കു വേണ്ടി ജാതി പറഞ്ഞ് വോട്ട് തേടി എന്ന രാജേന്ദ്രന്റെ പ്രസ്താവന അസംബന്ധം ആണെന്നും കെ.കെ.വിജയന്‍ പറഞ്ഞു. പുറത്താക്കല്‍ നടപടിക്കുശേഷം രാജേന്ദ്രനും എം.എം.മണിയും പരസ്പരം പോര്‍വിളി തുടരുന്നതിനിടെയാണ് പാര്‍ട്ടി പ്രാദേശിക നേതാക്കളും രാജേന്ദ്രനെതിരെ രംഗത്തെത്തിയത്.
