കരുവാരക്കുണ്ട് : സ്കൂൾ വിദ്യാർഥിനിക്കു മുന്നിൽ നഗ്നതാപ്രദർശനം നടത്തിയ യുവാവ് അറസ്റ്റിൽ. കരുവാരക്കുണ്ട് അച്ചുതൊടിക മാജിദ് (29) ആണ് അറസ്റ്റിലായത്. സ്കൂളിലേക്കു പോകുകയായിരുന്ന വിദ്യാർഥിനിയോട് കാറിൽ വന്ന പ്രതി അവശതയഭിനയിച്ച് കുടിവെള്ളം ചോദിക്കുകയും കുട്ടി വെള്ളം കൊടുത്തപ്പോൾ നഗ്നത പ്രദർശിപ്പിക്കുകയുമായിരുന്നുവെന്നാണു പരാതി.
പെൺകുട്ടി ഭയന്നോടി അടുത്ത വീട്ടിൽ കയറി രക്ഷപ്പെടുകയും തുടർന്ന് കുട്ടി പഠിക്കുന്ന വിദ്യാഭ്യാസ സ്ഥാപനത്തിലെത്തി വീട്ടുകാരുടെയും അധ്യാപകരുടെയും സഹായത്തോടെ പോലീസിൽ പരാതിപ്പെടുകയുമായിരുന്നു.തൊട്ടടുത്ത ദിവസം ഗൾഫിലേക്കു കടക്കാനുള്ള വിമാന ടിക്കറ്റും പ്രതിയുടെ കൈവശമുണ്ടായിരുന്നു. സി.ഐ. മനോജ് പറയറ്റയുടെ നേതൃത്വത്തിൽ എസ്.ഐ. കെ. ശിവൻ, എ.എസ്.ഐ.മാരായ എ.ആർ. അജിത്കുമാർ, ജെയിംസ് ജോൺ, കെ.എസ്. ഇല്യാസ്, സി.പി.ഒ. അജിത് എന്നിവരടങ്ങിയ സംഘമാണ് പ്രതിയെ അറസ്റ്റുചെയ്ത് കേസിൽ തുടരന്വേഷണം നടത്തുന്നത്. മഞ്ചേരി ജുഡീഷ്യൽ ഒന്നാംക്ലാസ് മജിസ്ട്രേറ്റ് കോടതിയിൽ ഹാജരാക്കിയ പ്രതിയെ 14 ദിവസത്തേക്ക് റിമാൻഡു ചെയ്തു.
