കിളിമാനൂർ : സ്കൂൾവിദ്യാർഥിനികളുടെ മുന്നിൽ നഗ്നതാപ്രദർശനം നടത്തുന്നത് പതിവാക്കിയയാളെ അറസ്റ്റുചെയ്തു. നെടുമങ്ങാട്, പഴകുറ്റി, കൊല്ലംകാവ്, നിമിഷം വീട്ടിൽ നിധിൻ പരമേശ്വരൻ (28)ആണ് പിടിയിലായത്. ബൈക്കിലെത്തിയ ഇയാൾ വഴി ചോദിക്കാനെന്ന വ്യാജേന അടുത്ത് നിർത്തിയാണ് കുട്ടികളോട് മോശമായി പെരുമാറിയത്.
ഒക്ടോബർ 26, നവംബർ 1 എന്നീ ദിവസങ്ങളിൽ കാരേറ്റ് വാമനപുരം ദേവസ്വം ബോർഡ് സ്കൂളിനു സമീപത്താണ് സംഭവം നടന്നത്. തുടർന്ന് വിദ്യാലയങ്ങൾക്കു മുന്നിൽ മഫ്തിയിൽ നിന്ന് പോലീസുകാർ നിരീക്ഷണം നടത്തിയിരുന്നു. ചൊവ്വാഴ്ച കാരേറ്റ് ദേവസ്വം ബോർഡ് സ്കൂളിനു സമീപത്തുനിന്നാണ് പ്രതി മഫ്തിയിലുണ്ടായിരുന്ന കിളിമാനൂർ പോലീസിന്റെ പിടിയിലായത്. കിളിമാനൂർ എസ്.എച്ച്.ഒ. എസ്.സനൂജ്, എസ്.ഐ. വിജിത്ത് കെ.നായർ, സീനിയർ സി.പി.ഒ. റിയാസ്, സി.പി.ഒ.മാരായ കിരൺ, സോജു, രജിത് രാജ്, റിയാസ് എന്നിവരടങ്ങിയ സംഘം അറസ്റ്റുചെയ്ത പ്രതിയെ കോടതി റിമാൻഡുചെയ്തു.
