കൊച്ചി : നമ്പർ 18 ഹോട്ടലിലെ പീഡന പരാതിയിൽ ഹോട്ടലുടമ റോയിയുടെ സുഹൃത്ത് സൈജു തങ്കച്ചനെ പോലീസ് ചോദ്യം ചെയ്തു. പെൺകുട്ടികളുടെ രഹസ്യ മൊഴിയുടെ അടിസ്ഥാനത്തിലാണ് ചോദ്യം ചെയ്യൽ. സൈജുവിന്റെ ഫോണിൽ നിന്നും ആരോപണം നേരിടുന്നവരുടെ ദൃശ്യങ്ങൾ കണ്ടെടുത്തു. സൈജുവിനെക്കുറിച്ചുള്ള പരാതിക്കാരുടെ പരാമർശങ്ങളാണ് ചോദ്യം ചെയ്യലിന് ആധാരം. ഇതോടൊപ്പം അഞ്ജലി എന്ന യുവതിയുമായി സൈജുവിനുള്ള അടുപ്പം, നമ്പർ 18 ഹോട്ടലുമായി ബന്ധപ്പെട്ട് ഇവർ നടത്തിയ ഇടപാടുകൾ ഇവയെല്ലാം അന്വേഷണത്തിന് വഴിയൊരുക്കും. മോഡലുകളുടെ മരണവുമായി ബന്ധപ്പെട്ട് സൈജുവിന്റെ ഫോൺ പോലീസ് വിശദമായി പരിശോധിച്ചിരുന്നു. അന്ന് ഫോണിൽ അഞ്ജലിയുടെ ദൃശ്യങ്ങളുണ്ടായിരുന്നു. മദ്യപിച്ചിട്ടുള്ള ദൃശ്യങ്ങളാണ് എന്നതാണ് അന്വേഷണ സംഘത്തിന് മനസിലാക്കാൻ സാധിച്ചത്.
എന്നാൽ അന്ന് ആവശ്യമായ തെളിവുകൾ ഇല്ലാതിരുന്നതിനാൽ അന്ന് അന്വേഷണം അഞ്ജലിയിലേക്ക് നീങ്ങിയിരുന്നില്ല. അതിനിടെയാണ് പെൺകുട്ടികളുടെ മൊഴിയിൽ അഞ്ജലിയുടെ പേര് പരാമർശിച്ചത്. അഞ്ജലിയാണ് പെൺകുട്ടികളെ ഹോട്ടലിലേക്ക് കൂട്ടിക്കൊണ്ട് പോയത് എന്നാണ് മൊഴി. അന്ന് സൈജു ഉപയോഗിച്ചിരുന്ന ഔഡി കാറിലാണ് അഞ്ജലി പെൺകുട്ടികളെ ഹോട്ടലിലേക്ക് കൂട്ടിക്കൊണ്ട് പോയത് എന്നായിരുന്നു പെൺകുട്ടികളുടെ മൊഴി. തുടർന്നാണ് അന്വേഷണം അഞ്ജലിയിലേക്കും എത്തിയത്.
കഴിഞ്ഞ ഒക്ടോബറിൽ നമ്പർ 18 ഹോട്ടലിൽവെച്ച് ഹോട്ടലുടമ റോയി ജെ വയലാട്ട് ലൈംഗികമായി ഉപദ്രവിച്ചുവെന്നാണ് കോഴിക്കോട് സ്വദേശിയായ അമ്മയുടെയും മകളുടെയും പരാതി. ഫോർട്ട് കൊച്ചി പോലീസ് സ്റ്റേഷനിൽ രജിസ്റ്റർ ചെയ്ത കേസിൽ റോയിയുടെ സുഹൃത്ത് സൈജു തങ്കച്ചനേയും സൈജുവിന്റെ സുഹൃത്ത് അഞ്ജലിയേയും പ്രതി ചേർത്തിട്ടുണ്ട്. മോഡലുകളുടെ അപകടമരണത്തിന് ഏതാനും ആഴ്ചകൾക്ക് മുമ്പായിരുന്നു പീഡനം. പീഡന ദൃശ്യങ്ങൾ മറ്റു പ്രതികൾ ചേർന്ന് മൊബൈലിൽ പകർത്തി. പോലീസിൽ പരാതി നൽകിയാൽ ഈ ദൃശ്യങ്ങൾ സാമൂഹിക മാധ്യമങ്ങൾ വഴി പ്രചരിപ്പിക്കുമെന്ന് അഞ്ജലി ഭീഷണിപ്പെടുത്തിയെന്നും പെൺകുട്ടി പരാതിയിൽ പറഞ്ഞിരുന്നു.
