കൊച്ചി : സില്വര് ലൈന് പദ്ധതിയുമായി ബന്ധപ്പെട്ട ഭൂമി ഏറ്റെടുക്കല് നടപടി ചോദ്യം ചെയ്തുളള ഹര്ജികള് ഹൈക്കോടതി ഇന്ന് വീണ്ടും പരിഗണിക്കും. കെ റെയില് എന്ന് രേഖപ്പെടുത്തിയ തൂണുകള് സര്ക്കാര് സ്ഥാപിക്കുന്നത് നിയമവിരുദ്ധമാണെന്ന് കോടതി ഇടക്കാല ഉത്തരവ് പുറപ്പെടുവിച്ചിരുന്നു. പദ്ധതി സംബന്ധിച്ച് നിലപാട് വ്യക്തമാക്കാന് കേന്ദ്ര സര്ക്കാരിനോടും സിംഗിള് ബെഞ്ച് ആവശ്യപ്പെട്ടിട്ടുണ്ട്. അസിസ്റ്റന്റ് സോളിസിറ്റര് നേരിട്ട് ഹാജരായി നിലപാട് വിശദമാക്കണമെന്നാണ് നിര്ദേശം. ജനങ്ങളെ ബുദ്ധിമുട്ടിച്ചും ഭീഷണിപ്പെടുത്തിയുമല്ല പദ്ധതി നടപ്പാക്കേണ്ടതെന്നായിരുന്നു കഴിഞ്ഞ സിറ്റിങ്ങില് ജസ്റ്റീസ് ദേവന് രാമചന്ദ്രന്റെ നിലപാട്. അതേസമയം, ഇന്നലെ അങ്കമാലി എളവൂരില് കെ റെയില് സ്ഥലപരിശോധനയ്ക്കെത്തിയ ഉദ്യോഗസ്ഥരെ നാട്ടുകാര് തടഞ്ഞിരുന്നു.
കെ റെയില് കുറ്റികള് നാട്ടുന്നതിനുള്ള സ്ഥലപരിശോധനയ്ക്ക് എത്തിയവരെയാണ് തടഞ്ഞത്. പ്രതിഷേധം കണക്കിലെടുത്ത് ഉദ്യോഗസ്ഥര് മടങ്ങേണ്ടിയും വന്നു. എറണാകുളം-തൃശൂര് ജില്ലാ അതിര്ത്തിയില് അങ്കമാലി കറുകുറ്റിയ്ക്കടുത്ത് എളവൂര് പാറക്കടവിലൂടെയാണ് നിര്ദ്ദിഷ്ട കെ-റെയില് പാത. ഇവിടെ പാത കടന്നു പോകുന്നിടത്ത് കുറ്റികള് നാട്ടാനുള്ള സ്ഥല പരിശോധനയ്ക്കായാണ് നാല് കെ റെയില് ഉദ്യോഗസ്ഥരെത്തിയത്. എന്നാല് പരിശോധന അനുവദിക്കില്ലെന്ന് നിലപാടെടുത്ത് നാട്ടുകാര് തടഞ്ഞു. ഇതോടെ ഉദ്യോഗസ്ഥര് മടങ്ങുകയായിരുന്നു.
എളവൂര് പാറക്കടവില് ജനവാസ-കാര്ഷിക മേഖലയിലൂടെ കടന്ന് പോകുന്ന കെ റെയില് പദ്ധതി അനുവദിക്കില്ലെന്ന ഉറച്ച നിലപാടിലാണ് നാട്ടുകാര്. കെ റെയില് പദ്ധതിയ്ക്കെതിരെ നാട്ടുകാര് സമര സമിതി രൂപീകരിച്ചിട്ടുണ്ട്. തുടര് പരിശോധനയ്ക്കോ സ്ഥലം അടയാളപ്പെടുത്താനുള്ള കുറ്റികള് നാട്ടാനോ ഉദ്യോഗസ്ഥര് വീണ്ടുമെത്തിയാല് ഇനിയും തടയുമെന്ന നിലപാടിലാണ് സമര സമിതി.
