തിരുവനന്തപുരം : ശ്രദ്ധിച്ചു വോട്ടു ചെയ്തില്ലെങ്കിൽ ഉത്തർപ്രദേശ് കേരളമാവുമെന്ന ഉത്തർപ്രദേശ് മുഖ്യമന്ത്രി യോഗി ആദിത്യനാഥിന്റെ പ്രസ്താവനയ്ക്കു നിയമസഭയിലും മറുപടി നൽകി മുഖ്യമന്ത്രി പിണറായി വിജയൻ. ഒരു മുഖ്യമന്ത്രി രണ്ടു സംസ്ഥാനങ്ങളെ താരതമ്യപ്പെടുത്തുന്നത് ശരിയല്ല. യോഗിയുടേത് രാഷ്ട്രീയമായി ഉയർത്തിയ ശരിയല്ലാത്ത വർത്തമാനമെന്നും അദ്ദേഹം പറഞ്ഞു. നേരത്തേ ട്വീറ്റിലൂടെയും മുഖ്യമന്ത്രി മറുപടി നൽകിയിരുന്നു. യുപിയില്‍ ആദ്യഘട്ട പോളിങ്ങ് ആരംഭിക്കുന്നതിനു തൊട്ടുമുൻപായിരുന്നു യോഗി വിവാദ പ്രസ്താവന നടത്തിയത്. ശ്രദ്ധിച്ചു വോട്ടു ചെയ്തില്ലെങ്കിൽ 5 വർഷം കൊണ്ടുളള നേട്ടങ്ങൾ എല്ലാം ഇല്ലാതായി യുപി കേരളമോ കശ്മീരോ ബംഗാളോ പോലെ ആവുമെന്നും തീവ്രവാദികൾ അവസരം നോക്കി ഇരിക്കുകയാണെന്നുമാണ് യോഗി പറഞ്ഞത്. സ്വന്തം ട്വിറ്റർ ഹാൻഡിലിൽ പോസ്റ്റ് ചെയ്ത വിഡിയോയിലായിരുന്നു യോഗിയുടെ പരാമർശം.
