കൽപറ്റ: വയനാട്ടിലെ തന്റെ ഓഫിസ് തകര്‍ത്ത വിദ്യാർഥി സംഘടനയോട് ദേഷ്യം വെച്ചു പുലർത്തുന്നില്ലെന്ന് കോൺഗ്രസ് നേതാവ് രാഹുൽ ഗാന്ധി എം.പി. ഓഫിസ് തകര്‍ത്തത് ഉത്തരവാദിത്വമില്ലാത്ത നടപടിയാണെന്നും കൽപറ്റയിൽ രാഹുൽ ഗാന്ധി പറഞ്ഞു. എസ്.എഫ്.ഐ പ്രവർത്തകർ അടിച്ചുതകർത്ത കൽപറ്റ സിവിൽ സ്റ്റേഷനു സമീപത്തെ എം.പി ഓഫിസ് സന്ദർശിച്ച രാഹുൽ ഗാന്ധി, അക്രമിക്കപ്പെട്ടത് ജനങ്ങളുടെ ഓഫിസാണെന്നും ചൂണ്ടിക്കാട്ടി.
പ്രധാനമന്ത്രിയും ആഭ്യന്തര മന്ത്രിയും ആർ.എസ്.എസും ബി.ജെ.പിയും ചേര്‍ന്നാണ് ദേഷ്യത്തിന്റെയും വെറുപ്പിന്റെയും അന്തരീക്ഷം രാജ്യത്ത് സൃഷ്ടിച്ചതെന്നും രാഹുൽ പറഞ്ഞു. ഓഫിസ് സന്ദര്‍ശിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. കോൺഗ്രസ് നേതാക്കളും അദ്ദേഹത്തിനോടൊപ്പമുണ്ടായിരുന്നു.
‘എന്റെ ഓഫിസ് എന്നതിനേക്കാൾ, വയനാട്ടിലെ സാധാരണക്കാരായ ഒരുപാടുപേരുടെ ശബ്ദം ഉയര്‍ന്നു കേള്‍ക്കുന്നതിനുള്ള ഓഫിസ് ആണിത്. ദൗര്‍ഭാഗ്യകരമായ സംഭവമാണിത്. അക്രമം ഒന്നിനും പരിഹാരമല്ല. കുട്ടികളാണ് ഇത് ചെയ്തതെന്നാണ് മനസ്സിലാക്കുന്നത്. അനന്തരഫലങ്ങള്‍ ചിന്തിക്കാതെയായിരിക്കാം അവര്‍ അക്രമം നടത്തിയത്. ഉത്തരവാദരഹിതമായാണ് അവര്‍ ഇത്തരമൊരു ആക്രമണം നടത്തിയത്. അതില്‍ എനിക്ക് അവരോട് ദേഷ്യമൊന്നുമില്ല. രാഷ്ട്രീയ ആശയങ്ങളിലുള്ള വൈരുദ്ധ്യത്താൽ അക്രമം നടത്തുന്നത് അംഗീകരിക്കാനാവില്ല. എങ്കിലും അവരോട് ക്ഷമിക്കുന്നു.’ -രാഹുല്‍ ഗാന്ധി പറഞ്ഞു.
രാജ്യത്തെ ജനങ്ങളെ ഒന്നിച്ച് നിര്‍ത്താനാണ് കോണ്‍ഗ്രസ് ശ്രമിക്കുന്നത്. ആർ.എസ്.എസും ബി.ജെ.പിയും രാജ്യത്ത് ചെയ്തുകൊണ്ടിരിക്കുന്ന അക്രമങ്ങളായാലും വയനാട്ടില്‍ സംഭവിച്ച അക്രമമായാലും കോണ്‍ഗ്രസിന്റെ തത്വങ്ങള്‍ക്ക് എതിരാണ്. പ്രധാനമന്ത്രിയും ആഭ്യന്തര മന്ത്രിയും ആർ.എസ്.എസും ബി.ജെ.പിയും ചേര്‍ന്നാണ് ദേഷ്യത്തിന്റെയും വെറുപ്പിന്റെയും അന്തരീക്ഷം രാജ്യത്ത് സൃഷ്ടിച്ചത്. ഇന്ത്യയുടെ താല്‍പര്യത്തിനും ജനങ്ങളുടെ താല്‍പര്യത്തിനും എതിരായ ദേശവിരുദ്ധ പ്രവര്‍ത്തനങ്ങളാണ് അവര്‍ നടത്തുന്നത്. അവരുടെ അത്തരം നടപടികളാണ് ദുരന്തങ്ങള്‍ക്ക് വഴിവെച്ചത്.
