ഉദയ്പുർ∙ രാജസ്ഥാനിൽ കർണിസേനയുടെ സംസ്ഥാന പ്രസിഡന്റ് ഭൻവർ സിങ്ങിനു വെടിയേറ്റു. ഉദയ്പുരിൽ നടന്ന കർണിസേനയുടെ ഒരു പരിപാടിക്കിടെയാണു സംഭവം. സംഘടനയിലെ മുൻ അംഗമാണ് ആക്രമണത്തിനു പിന്നിൽ. സംഭവസ്ഥലത്തുവച്ചു തന്നെ പ്രതിയെ പൊലീസ് പിടികൂടി. ഭൻവർ സിങിന് നേരെയുണ്ടായ ആക്രമണം രാഷ്ട്രീയ പ്രേരിതമാണെന്നും കർണി സേനയെ തകർക്കാനാണെന്നും സംഘടനയുടെ ദേശീയ പ്രസിഡന്റ് മഹിപാൽ മകർണ പറഞ്ഞു. ചികിത്സയിൽ കഴിയുന്ന ഭൻവർ സിങിന്റെ ആരോഗ്യനിലയെക്കുറിച്ചു വ്യക്തമായ വിവരങ്ങളില്ല. ഈ വർഷം അവസാനം നിയമസഭാ തിരഞ്ഞെടുപ്പിന് ഒരുങ്ങുന്ന രാജസ്ഥാനിൽ, രജപുത് വോട്ട് ബാങ്ക് ലക്ഷ്യമിട്ടു നിരവധി യോഗങ്ങളും മീറ്റിങ്ങുകളും സംഘടിപ്പിക്കുകയാണ് കർണിസേന.
