ആലപ്പുഴ > ആറരവയസുകാരിയെ പീഡിപ്പിച്ച കേസിൽ പ്രതിയായ ബന്ധുവിന് 41.3 വർഷം തടവും ഒന്നര ലക്ഷം രൂപ പിഴയും. നെടുമുടി പൊലീസ് 2022ൽ രജിസ്റ്റർചെയ്ത കേസിലാണ് ആലപ്പുഴ സ്പെഷ്യൽ കോടതിയുടെ വിധി. 52 വയസുകാരനായ പ്രതി കുട്ടിയുടെ വീട്ടിൽ താമസിച്ച സമയത്ത് പീഡനത്തിനിരയാക്കി എന്നാണ് കേസ്.
12 വയസിൽ താഴെ പ്രായമുള്ള കുട്ടിയെ ലൈംഗികമായി പീഡിപ്പിച്ചതിന് 20 വർഷവും നിയമപരമായി സംരക്ഷിക്കാൻ ബാധ്യതയുള്ളയാൾ തന്നെ ഇത്തരം കുറ്റത്തിൽ ഏർപ്പെട്ടതിന് 20 വർഷവും ബലപ്രയോഗത്തിലൂടെ ശല്യംചെയ്തതിന് ഒരു വർഷവും പോക്സോ നിയമപ്രകാരം പിന്തുടർന്നു ശല്യംചെയ്തതിന് മൂന്ന് മാസവും ഒന്നരലക്ഷം രൂപയുമാണ് ജഡ്ജി ആഷ് കെ ബാൽ ശിക്ഷ വിധിച്ചത്. പിഴത്തുകയിൽ 50,000 രൂപ കുട്ടിക്ക് നഷ്ടപരിഹാരമായി നൽകും. സ്പെഷ്യൽ പബ്ലിക് പ്രോസിക്യൂട്ടർ എസ് സീമ, പ്രോസിക്യൂട്ടർ അംബിക കൃഷ്ണൻ എന്നിവർ ഹാജരായി.
