തിരൂർ> ഡൽഹിയിൽ ഉപരിപഠനത്തിന് പോയ മലയാളി വിദ്യാർഥിനിയെ മയക്കുമരുന്ന് നൽകി പീഡിപ്പിച്ച കേസിൽ തിരൂർ സ്വദേശിയായ യുവാവ്‌ അറസ്റ്റിൽ. നിരവധി മയക്കുമരുന്ന് കേസുകളിൽ പ്രതിയായ പെരുന്തല്ലൂർ സ്വദേശി ടാർസെൻ എന്നറിയപ്പെടുന്ന വീര്യത്ത്പറമ്പിൽ സിറാജുദ്ദീനെ ( 34)യാണ്‌ ഡൽഹി പൊലീസ് തിരൂരിൽ അറസ്റ്റുചെയ്തത്. കഴിഞ്ഞവർഷം ഒക്ടോബറിലാണ് വിദ്യാർഥിനിക്കുനേരെ ലൈംഗിക അതിക്രമമുണ്ടായത്. വിദ്യാർഥിനിയുടെ സുഹൃത്തുവഴിയാണ്‌ സിറാജുദ്ദീൻ പരിചയപ്പെടുന്നത്‌.
പിന്നീട്‌ വദ്യാർഥിനിയുടെ ബർത്ത്‌ ഡേ പാർട്ടിക്ക്‌ മയക്കുമരുന്ന് നൽകി പീഡിപ്പിച്ചെന്നാണ്‌ കേസ്‌. കഴിഞ്ഞദിവസം എത്തിയ ഡൽഹി പൊലീസ് തിരൂർ പൊലീസിന്റെ സഹായത്തോടെയാണ് ഇയാളെ പിടികൂടിയത്. മറ്റൊരു പ്രതിയായ പരിയാപുരം സ്വദേശി ഹിഷാമിനെ ജനുവരിയിൽ ഡൽഹി പൊലീസ് കസ്റ്റഡിയിൽ എടുത്തിരുന്നു. സിറാജുദ്ദീനെ തിരൂർ മജിസ്ട്രേട്ടുമുമ്പാകെ ഹാജരാക്കി ഡൽഹിയിലേക്ക് കൊണ്ടുപോയി.
