തിരുവനന്തപുരം : പ്രധാനമന്ത്രി നരേന്ദ്ര മോദിയെ പ്രശംസിച്ചും വിമർശിച്ചും കോൺഗ്രസ് നേതാവ് ശശി തരൂർ എംപി. മോദി അതിശക്തമായ വീര്യവും ചടുലതയും ഉള്ള മനുഷ്യനാണ്. രാഷ്ട്രീയത്തിൽ അപൂർവമായി മാത്രം കാണുന്ന പലതും അദ്ദേഹം ചെയ്തിട്ടുണ്ട്. നിയമസഭാ തെരഞ്ഞെടുപ്പിൽ ഉത്തർപ്രദേശ് ഉൾപ്പെടെ നാല് സംസ്ഥാനങ്ങളിൽ ബിജെപി നേടിയ വിജയത്തിന്റെ വിജയത്തിന് കാരണം മോദിയാണെന്നും തരൂർ പറഞ്ഞു. തെരഞ്ഞെടുപ്പിൽ ഇത്രയും വലിയ മാർജിനിൽ ബിജെപി വിജയിക്കുമെന്ന് പ്രതീക്ഷിച്ചിരുന്നില്ല, പക്ഷേ മോദി വിജയിച്ചു. ഒരു ദിവസം വോട്ടർമാർ ബിജെപിയെ തള്ളിക്കളയും, എന്നാൽ ഇന്ന് മോദി ആഗ്രഹിച്ചത് ജനം നൽകി. രാജ്യത്തെ വർഗീയവും മതപരവുമായ അടിസ്ഥാനത്തിൽ വിഭജിക്കുന്ന ശക്തികളെ പ്രധാനമന്ത്രി സമൂഹത്തിൽ അഴിച്ചുവിട്ടിരിക്കുന്നുവെന്നും തരൂർ കുറ്റപ്പെടുത്തി.
ഉത്തരാഖണ്ഡിലും ഗോവയിലും കോൺഗ്രസിന് മികച്ച പ്രകടനം നടത്താൻ കഴിയുമായിരുന്നെന്ന് ജയ്പൂർ ലിറ്ററേച്ചർ ഫെസ്റ്റിവലിൽ (ജെഎൽഎഫ്) തരൂർ പറഞ്ഞു. ഏറ്റവും വലിയ ഒറ്റകക്ഷിയാകാൻ കോൺഗ്രസിന് നല്ല അവസരങ്ങളുണ്ടായിരുന്നു. കോൺഗ്രസ് പാർട്ടിക്ക് വേണ്ടി ശ്രദ്ധേയവും ഊർജ്ജസ്വലവുമായ പ്രചാരണമാണ് പ്രിയങ്ക ഗാന്ധി നടത്തിയതെന്ന് തരൂർ കൂട്ടിച്ചേർത്തു. ഒരു വ്യക്തിയുടെ പ്രചാരണത്തിന്റെ പേരിൽ കോൺഗ്രസിനെ കുറ്റപ്പെടുത്താൻ കഴിയുമെന്ന് കരുതുന്നില്ല. തെരഞ്ഞെടുപ്പ് പ്രചാരണത്തിനിടെ പല തവണ ഉത്തർപ്രദേശ് പൊലീസ് പ്രിയങ്കാ ഗാന്ധിയെ അറസ്റ്റ് ചെയ്തു. രാഷ്ട്രീയ വിശകലന വിദഗ്ധർ ഫലങ്ങൾ മുൻകൂട്ടി നിശ്ചയിച്ച തീരുമാനങ്ങളായി കാണിക്കുന്നതിൽ ശശി തരൂർ ആശ്ചര്യം പ്രകടിപ്പിച്ചു. എക്സിറ്റ് പോളുകൾ വരുന്നതുവരെ വളരെ കുറച്ച് ആളുകൾ മാത്രമാണ് ബിജെപിയുടെ വിജയം പ്രവചിച്ചിരുന്നതെന്നും അദ്ദേഹം പറഞ്ഞു.
