കൽപ്പറ്റ > പൂക്കോട് വെറ്ററിനറി കോളേജിലെ ഹോസ്റ്റലിൽ വിദ്യാർഥി സിദ്ധാർഥൻ തൂങ്ങിമരിച്ച സംഭവത്തിൽ പൊലീസ് അറസ്റ്റ് ചെയ്ത മുഖ്യപ്രതിയെ പൊലീസ് കോളേജ് ഹോസ്റ്റലിൽ എത്തിച്ച് തെളിവെടുത്തു. കൊല്ലം ഓടനവട്ടം സ്വദേശി സിൻജോ ജോൺസനെയാണ്(22) ഹോസ്റ്റലിൽ എത്തിച്ച് തെളിവെടുത്തത്. ഞായർ വൈകിട്ട് അഞ്ചോടെയാണ് പൊലീസ് സംഘം പ്രതിയുമായി ഹോസ്റ്റലിൽ എത്തിയത്.
സിദ്ധാർഥനെ മർദിച്ച മുറിയിലും ഹോസ്റ്റൽ മുറ്റത്തും തെളിവെടുത്തു. മർദിക്കാൻ ഉപയോഗിച്ച ഗ്ലു ഗണ്ണിന്റെ വയർ കണ്ടെടുത്തു. ഒരുമണിക്കൂറോളം തെളിവെടുപ്പ് നീണ്ടു. കല്പ്പറ്റ ഡിവൈഎസ്പി ടി എന് സജീവന്റെ നേതൃത്വത്തിലുള്ള സംഘമാണ് ഹോസ്റ്റലില് പ്രതിയുമായി തെളിവെടുപ്പിനെത്തിയത്.
