കണ്ണൂര് : സില്വര് ലൈന് നടപ്പിലാക്കുന്നതുമായി ബന്ധപ്പെട്ട സാമൂഹിക ആഘാത പഠനം ഇന്ന് ആരംഭിക്കും. കോട്ടയം ആസ്ഥാനമായുള്ള കേരള വൊളണ്ടിയര് ഹെല്ത്ത് സര്വ്വീസസ് നടത്തുന്ന പഠനത്തിന് കണ്ണൂര് ജില്ലയിലെ പയ്യന്നൂര് പഞ്ചായത്തിലാണ് തുടക്കമാവുക. പദ്ധതി വരുമ്പോള് ഭൂമി നഷ്ടപ്പെടുന്ന കുടുംബങ്ങളെ നേരില് കണ്ട് അവരുന്നയിക്കുന്ന പ്രശ്നങ്ങള് കേള്ക്കുകയാണ് ആദ്യ ഘട്ടത്തിലെ പ്രവര്ത്തനം. ഇതിനായി ചോദ്യാവലി തയ്യാറാക്കി വളണ്ടിയര്മാര് വീടുകളിലെത്തും. കണ്ണൂര് ജില്ലയില് മാത്രം കെ റെയില് കടന്നുപോകുന്ന 61. 7 കിലോ മീറ്റര് ദൂരത്ത് 20 വില്ലേജുകളിലായി നൂറ്റി എട്ട് ഹെക്ടര് ഭൂമി ഏറ്റെടുക്കേണ്ടതുണ്ട്. വീടുകളില് സര്വ്വേ നടത്തിയും ജനപ്രതിനിധികളെ കേട്ടും റിപ്പോര്ട്ട് 100 ദിവസത്തിനകം സമര്പ്പിക്കാനാണ് ഏജന്സിക്ക് സര്ക്കാര് നല്കിയിരിക്കുന്ന നിര്ദ്ദേശം
ഇതിനിടെ പലയിടങ്ങളിലും പദ്ധതിക്കെതിരെയുള്ള നാട്ടുകാരുടെ പ്രതിഷേധം തുടരുകയാണ്. അങ്കമാലി പുളിയനത്ത് സില്വര് ലൈനിനെതിരെയുള്ള സമരം ഇന്നും തുടരും. ഇന്ന് ഉദ്യോഗസ്ഥര് സര്വ്വേ കല്ലുകള് നാട്ടിലെത്തിയാല് തടയാനാണ് സമരസമിതിയുടെ തീരുമാനം. ഇന്നലെ ഇരുപത് സര്വ്വേ കല്ലുകള് പോലീസ് സംരക്ഷണയില് നാട്ടിയിരുന്നു. ഇവയെല്ലാം പിഴുതുമാറ്റാന് വിവിധ സംഘടനകള് ആലോചിക്കുന്നുണ്ട്. കെ റെയില് വിരുദ്ധ സമിതിയുടെ സംസ്ഥാനതലത്തിലുള്ള പ്രതിനിധികള് ഇന്ന് പ്രദേശം സന്ദര്ശിക്കും.
കല്ലുകള് നാട്ടിയതിനെതിരെ പ്രതിഷേധം ശക്തമാക്കാന് യൂത്ത് കോണ്ഗ്രസും തീരുമാനിച്ചിട്ടുണ്ട്. പ്രവര്ത്തകര് കൂട്ടമായി കല്ലുകള് സ്ഥാപിച്ച പാടത്ത് എത്തി പിഴുതുമാറ്റുതിനെക്കുറിച്ചും ആലോചിക്കുന്നു അതേസമയം ഇന്ന് സര്വേ കല്ലുകള് സ്ഥാപിക്കുന്ന പ്രവര്ത്തി നടത്താന് ഇടയില്ല എന്നാണ് കെ റെയില് ഉദ്യോഗസ്ഥര് നല്കുന്ന വിവരം. ഉദ്യോഗസ്ഥര് ആവശ്യപ്പെട്ടാല് സംരക്ഷണം നല്കുമെന്ന് ആലുവ പോലീസും അറിയിച്ചു.
