ചെന്നൈ : മകൻ മറ്റൊരു ജാതിയിൽപ്പെട്ട പെൺകുട്ടിയുമായി ഒളിച്ചോടി വിവാഹം കഴിച്ചതിന് അമ്മയ്ക്ക് പെൺവീട്ടുകാരുടെ ക്രൂരമർദനം. തമിഴ്നാട്ടിലെ വിരുദുനഗർ ജില്ലയിലെ തിരുച്ചുളി ബ്ലോക്കിലെ വാഗൈകുളം ഗ്രാമത്തിലാണ് സംഭവം. ചൊവ്വാഴ്ച രാത്രിയാണ് 45 കാരിയായ മീനാക്ഷിയെ ഒരു സംഘം ആളുകൾ ക്രൂരമായി ആക്രമിച്ചത്. പെൺകുട്ടിയുടെ ബന്ധുക്കളും മറ്റുള്ളവരും ചേർന്ന് മീനാക്ഷിയുടെ വീട്ടിൽ അതിക്രമിച്ച് കയറി അവരെ വലിച്ചിഴച്ച് പോസ്റ്റിൽ കെട്ടിയിട്ട് മർദിക്കുകയായിരുന്നു. മീനാക്ഷിയെ അരുപ്പുകോട്ട സർക്കാർ ആശുപത്രിയിൽ പ്രവേശിപ്പിച്ചതായി റിപ്പോർട്ട് ചെയ്തു.
പോലീസ് പറയുന്നതനുസരിച്ച് ജനുവരി 22 ന് മീനാക്ഷിയുടെ മകൻ അതേ ഗ്രാമത്തിലെ മറ്റൊരു ജാതിയിൽപ്പെട്ട പെൺകുട്ടിയുമായി ഒളിച്ചോടിയിരുന്നു. ഇവർ വിവാഹിതരാകുകയും തുടർന്ന് ബന്ധുക്കളിൽ നിന്ന് അഭയം തേടി അരുപ്പുക്കോട്ട വനിതാ പോലീസ് സ്റ്റേഷനെ സമീപിക്കുകയും ചെയ്തു. മൂന്ന് ദിവസത്തിന് ശേഷം ജനുവരി 25നാണ് പെൺകുട്ടിയുടെ ബന്ധുക്കളും മറ്റുള്ളവരും ചേർന്ന് മീനാക്ഷിയുടെ വീട്ടിൽ അതിക്രമിച്ച് കയറി അവരെ വലിച്ചിഴച്ച് പോസ്റ്റിൽ കെട്ടിയിട്ട് മർദിച്ചത്. മീനാക്ഷിയുടെ പരാതിയുടെ അടിസ്ഥാനത്തിൽ പെൺകുട്ടിയുടെ അമ്മ ഉൾപ്പെടെ 14 പേർക്കെതിരെ മർദനത്തിനും അസഭ്യം പറഞ്ഞതിനും പറലച്ചി പോലീസ് കേസെടുത്തു.
