ഡല്ഹി: ആഭ്യന്തര യുദ്ധം രൂക്ഷമായ സുഡാനിലെ സംഘര്ഷത്തിന്റെ പശ്ചാത്തലത്തില് മലയാളികള്ക്കായി കേരള ഹൗസില് ഹെല്പ്പ് ഡെസ്ക് തുറന്നു. 24 മണിക്കൂറും പ്രവര്ത്തിക്കുന്ന ഡെസ്കാണ് തുറന്നത്. ബന്ധപ്പെടേണ്ട നമ്പര്- 011 23747079.
അതേസമയം ആഭ്യന്തര യുദ്ധം രൂക്ഷമായ സുഡാനില് കുടുങ്ങിക്കിടക്കുന്നവരെ നാട്ടിലെത്തിക്കാനുള്ള രക്ഷാദൗത്യത്തിന് ഒരുങ്ങാന് പ്രധാനമന്ത്രി നേരത്തെ നിര്ദ്ദേശം നല്കിയിരുന്നു. അടിയന്തര ഒഴിപ്പിക്കല് വേണ്ടിവന്നാല് അതിന് സജ്ജമായിരിക്കാനാണ് നിര്ദേശം. രക്ഷാദൗത്യത്തിനുള്ള ആസൂത്രണം നടത്താനും പ്രധാനമന്ത്രി നരേന്ദ്ര മോദി ഉദ്യോഗസ്ഥര്ക്ക് നിര്ദേശം നല്കി. പ്രധാനമന്ത്രി നരേന്ദ്രമോദി, വിദേശകാര്യ മന്ത്രി എസ് ജയശങ്കര്, സിപിവി & ഐഒഎ സെക്രട്ടറി ഔസാഫ് സെയ്ദ്, ഗള്ഫ് രാജ്യങ്ങളിലെ അംബാസിഡര്മാര് എന്നിവര് പങ്കെടുത്ത ഓണ്ലൈന് യോഗത്തിലാണ് ഒഴിപ്പിക്കലിന് വേണ്ട പദ്ധതികള് തയ്യാറാക്കാന് പ്രധാനമന്ത്രി നിര്ദ്ദേശം നല്കിയത്.
