തിരുവനന്തപുരം: പുതുപ്പള്ളി ഉപതെരഞ്ഞെടുപ്പിലെ യു.ഡി.എഫ് സ്ഥാനാര്ഥി ഉമ്മന് ചാണ്ടിയുടെ കുടുംബത്തില് നിന്നാണെന്ന് താൻ പറഞ്ഞിട്ടില്ലെന്ന് കെ.പി.സി.സി പ്രസിഡന്റ് കെ. സുധാകരന് എം.പി. സ്ഥാനാര്ഥി ആരാണ് എന്ന ചോദ്യം മാധ്യമങ്ങളില് നിന്നുണ്ടായി. ഉമ്മന് ചാണ്ടിയുടെ കുടുംബത്തില് നിന്ന് ആകുമോ സ്ഥാനാര്ഥി എന്ന ചോദ്യത്തിന് അതും പരിഗണിക്കും എന്നാണ് താന് ഉദ്ദേശിച്ചത്.
ഉമ്മന് ചാണ്ടിയുടെ കുടുംബത്തില് നിന്നാണ് സ്ഥാനാര്ഥി എന്ന് പറയുകയായിരുന്നില്ല. സ്ഥാനാര്ഥിയെ തീരുമാനിക്കുമ്പോള് ഉമ്മന് ചാണ്ടിയുടെ കുടുംബവുമായും ആലോചിക്കും എന്നാണ് ഉദ്ദേശിച്ചത്. സ്ഥാനാര്ഥി ആര് എന്നതില് ഒരു തര്ക്കവും പാര്ട്ടിയില് ഉണ്ടാകില്ല എന്നാണ് താന് വ്യക്തമാക്കിയത്. സ്ഥാനാര്ഥി നിര്ണ്ണയം സംബന്ധിച്ച് ഒരു ചര്ച്ചയും പാര്ട്ടിയില് നടന്നിട്ടില്ലെന്നും കെ. സുധാകരന് പറഞ്ഞു.
