പനാജി: അമിത വേഗതയിലെത്തിയ കാര് മൂന്ന് കാറുകളിലും ഒരു മോട്ടോര് സൈക്കിളിലും ഒരു സ്കൂട്ടറിലും ഇടിച്ചതിനെ തുടര്ന്ന് മൂന്ന് പേര് മരിച്ചു. സ്കൂട്ടറില് സഞ്ചരിച്ച ദമ്പതികളും മോട്ടോര് സൈക്കിള് ഓടിച്ചയാളുമാണ് മരിച്ചത്. ഗോവയുടെ തലസ്ഥാനമായ പനാജിക്ക് സമീപമാണ് സംഭവം. പനാജിയില് നിന്ന് 15 കിലോമീറ്റര് അകലെ പോണ്ട-പനാജി ദേശീയ പാതയിലെ ബനസ്തരിം ഗ്രാമത്തില് ഞായറാഴ്ച രാത്രിയാണ് അപകടമുണ്ടായത്. ദിവാര് സ്വദേശി സുരേഷ് ഫഡ്ട്ടെ (58), ഭാര്യ ഭാവന (52), ഉന്ദിര് ബന്ദോറയില് നിന്നുള്ള അനൂപ് കര്മാക്കര് (26) എന്നിവരാണ് മരിച്ചത്.
ആറ് പേര്ക്ക് പരിക്കേറ്റു. അമിത വേഗതയിലെത്തിയ മെഴ്സിഡസ് കാര് സുരേഷും അനൂപും ഓടിച്ചിരുന്ന ഇരുചക്ര വാഹനങ്ങളിലാണ് ആദ്യം ഇടിച്ചത്. തുടര്ന്ന് നിയന്ത്രണം വിട്ട കാര് എതിര്ദിശയില് വന്ന മറ്റ് മൂന്ന് കാറുകളിലും ഇടിച്ചു. മെഴ്സിഡസ് കാര് ഓടിച്ചയാള് മദ്യലഹരിയിലായിരുന്നുവെന്നും ഇയാളെ അറസ്റ്റ് ചെയ്തെന്നും മര്ഡോള് പോലീസ് പറഞ്ഞു. പരേഷ് എ സിനായ് സവര്ദേക്കര് എന്നയാളെയാണ് അറസ്റ്റ് ചെയ്തത്. മനഃപൂര്വമല്ലാത്ത നരഹത്യ, മദ്യപിച്ച് വാഹനമോടിക്കല്, അശ്രദ്ധമായി വാഹനമോടിക്കല് എന്നീ കുറ്റങ്ങള് ചുമത്തി. അപകടത്തില് ആറ് വാഹനങ്ങള്ക്കും കേടുപാടുകള് സംഭവിച്ചു.
