കൊച്ചി: കലൂരിലെ ഹോട്ടൽ മുറിയിൽ ഒന്നരവയസ്സുകാരിയെ വെള്ളത്തിൽ മുക്കിക്കൊന്ന കേസിൽ അമ്മൂമ്മ സിപ്‌സിക്കെതിരെ ജുവനൈൽ ജസ്‌റ്റിസ്‌ ആക്ട്‌ പ്രകാരം കേസെടുത്തു. കുട്ടിയുടെ സംരക്ഷണത്തിൽ വീഴ്‌ച വരുത്തിയതിനാണ്‌ കേസ്‌. ഇവരെ വൈകാതെ അറസ്‌റ്റ്‌ ചെയ്യുമെന്നാണ്‌ സൂചന. കുട്ടിയുടെ സംരക്ഷണം ഇവരുടെ കൈകളിൽ എങ്ങനെ എത്തിയെന്നതിനെക്കുറിച്ചും നോർത്ത്‌ പൊലീസ്‌ വിശദമായി അന്വേഷിക്കും.
കൊലപാതകത്തിൽ സിപ്‌സിക്ക്‌ പങ്കില്ലെന്നാണ്‌ പൊലീസിന്റെ പ്രാഥമിക നിഗമനം. ഇവർക്കെതിരെ വിവിധ ജില്ലകളിൽ മോഷണം മുതൽ കഞ്ചാവ്‌ കേസുകൾ വരെയുണ്ടെന്ന്‌ പൊലീസ്‌ അന്വേഷണത്തിൽ കണ്ടെത്തി. അങ്കമാലി പൊലീസ്‌ സ്‌റ്റേഷനിലെ റൗഡി ലിസ്‌റ്റിൽ പ്രധാനിയാണ്‌ സിപ്‌സി. അങ്കമാലി, ചെങ്ങമനാട്‌, കൊരട്ടി, തൃശ്ശൂർ, എറണാകുളം എന്നിവിടങ്ങളിൽ ഇവർക്കെതിരെ കേസുണ്ട്‌. 2021 ജനുവരിയിൽ അങ്കമാലിയിൽ സ്‌ക്കൂട്ടർ യാത്രികയെ നടുറോഡിൽ ഇടിച്ചു വീഴ്‌ത്തി വസ്‌ത്രങ്ങൾ വലിച്ചു കീറി ക്രൂരമായി മർദ്ദിച്ച കേസിൽ ഇവർ അറസ്‌റ്റിലായിട്ടുണ്ട്‌. വർഷങ്ങൾക്ക്‌ മുമ്പ്‌ കൊച്ചിയിലെ വനിതാ പൊലീസ്‌ സ്‌റ്റേഷന്റെ ഓടുപൊളിച്ച്‌ പുറത്തു കടക്കാൻ ശ്രമിച്ചതും വാർത്തയായിരുന്നു.
കുട്ടിയെ കൊന്നതിന്‌ അറസ്‌റ്റിലായ പ്രതി ജോൺ ബിനോയ് ഡിക്രൂസിനെ കസ്‌റ്റഡിയിൽ ലഭിക്കാൻ പൊലീസ്‌ ഉടനെ കോടതിയിൽ അപേക്ഷ നൽകും. സിപ്‌സിയുടെ കാമുകനായ ജോൺ ബിനോയ് ഡിക്രൂസ്‌ റിമാൻഡിലാണ്‌. അങ്കമാലി പാറക്കടവ് കോടുശേരി മനന്താനത്തുവീട്ടിൽ സജീവിന്റെയും ഡിക്സിയുടെയും ഇളയമകൾ ഒരു വയസ്സും എട്ടുമാസവും പ്രായമുള്ള നോറ മരിയയെ തിങ്കളാഴ്‌ച രാത്രിയാണ്‌ ജോൺ ബിനോയ് ഡിക്രൂസ്‌ മുക്കിക്കൊന്നത്‌.
