ന്യൂയോർക്ക്: മോഷ്ടിച്ച വാഹനത്തെ കുറിച്ച് അന്വേഷിക്കുന്നതിനിടെ വെടിയേറ്റ് രണ്ട് പൊലീസ് ഉദ്യോഗസ്ഥർ മരിച്ചു. ന്യൂയോർക്കിലെ സലീനയിലാണ് സംഭവം. വെടിവയ്പ്പിനെ തുടർന്ന് ഗുരുതരാവസ്ഥയിൽ ആശുപത്രിയിൽ പ്രവേശിപ്പിച്ചെങ്കിലും ഇന്ന് രാവിലെ മരണം സംഭവിക്കുകയായിരുന്നു. ഇവരുടെ പേരുവിവരങ്ങൾ വെളിപ്പെടുത്തിയിട്ടില്ല. കേസിലെ മുഖ്യപ്രതിയും കൊല്ലപ്പെട്ടതായി അധികൃതർ പറയുന്നു.
രാത്രി എട്ട് മണിക്ക് ശേഷം ഉദ്യോഗസ്ഥർ സലീനയിൽ വാഹനങ്ങൾ നിയന്ത്രിക്കുന്ന സമയത്താണ് സംഭവം നടക്കുന്നത്. നിർത്താതെ പോയ വാഹനത്തിന്‍റെ പിന്നാലെ പോയ പൊലീസിനെ സലീനയിലെ ഒരു വീട്ടിൽ വെച്ചാണ് വെടിയുതിർത്തത്. അന്വേഷണത്തിൽ വാഹനം മോഷ്ടിച്ചതാണെന്ന് വ്യക്തമായി. അമേരിക്കയിൽ അക്രമങ്ങൾ വർധിച്ച് വരുന്ന സാഹചര്യത്തിൽ പൊലീസ് കടുത്ത സുരക്ഷ ക്രമീകരണങ്ങൾ ഏർപ്പെടുത്തിയിട്ടുണ്ട്. സംഭവത്തിൽ അന്വേഷണം പുരോഗമിക്കുകയാണ്.
