പാലക്കാട് : തൃത്താലയ്ക്കു സമീപം പടിഞ്ഞാറങ്ങാടിയിൽ നീന്തൽ പഠിക്കുന്നതിനിടെ പ്ലസ് വൺ വിദ്യാർഥികൾ മുങ്ങി മരിച്ചു. പടിത്തറ പഞ്ചായത്തിലെ അരിക്കാട് ഒതളൂര് പുളിഞ്ചോട്ടില് തേവര് പറമ്പില് ശിവന്റെ മകന് ജഗന് (17) അരിക്കാട് ഒതളൂര് കൊമ്മാത്ര വളപ്പില് സുകുമാരന്റെ മകന് സായൂജ് (17) എന്നിവരാണ് മരിച്ചത്. തൃത്താല പടിഞ്ഞാറങ്ങാടി കല്ലടത്തൂരിലെ വല്ല്യോത്ര കുളത്തിൽ നീന്തൽ പഠിക്കുന്നതിനിടെ ആയിരുന്നു അപകടം.
സഹപാഠികളായ 8 പേർ കുമരനെല്ലൂരിലെ ഫുട്ബോൾ ക്യാംപിൽ പങ്കെടുത്തു മടങ്ങവേയാണ് കുളത്തിൽ കുളിക്കാൻ ഇറങ്ങിയത്. ഒരാൾ മുങ്ങുന്നത് കണ്ട് രക്ഷിക്കാൻ രണ്ടാമത്തെയാൾ ആഴമുള്ള ഭാഗത്തേക്ക് പോയതാണ് ദുരന്തത്തിൽ കലാശിച്ചത്. കുട്ടികളുടെ നിലവിളിക്കോട്ട് നാട്ടുകാര് എത്തി രക്ഷാപ്രവര്ത്തനം നടത്തിയെങ്കിലും രക്ഷിക്കാനായില്ല.ആശുപത്രിയിലെത്തിക്കും മുൻപേ ഇരുവരും മരിച്ചിരുന്നു. മൃതദേഹം എടപ്പാളിലെ സ്വകാര്യ ആശുപത്രിയിലേക്കു മാറ്റി. ഇരുവരും കല്ലടത്തൂര് ഗോഖലെ ഗവ. ഹയർ സെക്കൻഡറി സ്കൂളിലെ വിദ്യാർഥികളാണ്.
