യുഎൻ : യുക്രൈൻ പട്ടണമായ ബുച്ചയിൽ പൗരന്മാർ കൊല്ലപ്പെട്ടതിനെക്കുറിച്ച് സ്വതന്ത്ര അന്വേഷണം നടത്തണമെന്ന് യുഎൻ സെക്രട്ടറി ജനറൽ അന്റോണിയോ ഗുട്ടെറസ്. കൊല്ലപ്പെട്ട സാധാരണക്കാരുടെ ചിത്രങ്ങൾ വേദനാജനകമാണ്. കാര്യക്ഷമമായ അന്വേഷണം അത്യാവശ്യമാണെന്നും ഗുട്ടെറസ് ട്വീറ്റ് ചെയ്തു. ബുച്ചയിൽ റഷ്യ പൗരൻമാരെ കൂട്ടക്കൊല നടത്തിയെന്ന് യുക്രൈൻ ആരോപിച്ചിരുന്നു. റഷ്യയ്‌ക്കെതിരെ ശക്തമായ ഉപരോധങ്ങൾ ഏർപ്പെടുത്തണമെന്ന് ജി7 രാജ്യങ്ങളോട് യുക്രൈൻ വിദേശകാര്യമന്ത്രി ഡിമിത്രോ കുലേബ ആവശ്യപ്പെടുകയും ചെയ്തു. കൂട്ടക്കൊലയ്ക്ക് ഇരയാക്കപ്പെട്ട 410 പേരുടെ മൃതശരീരങ്ങൾ കണ്ടെത്തിയെന്ന് യുക്രെയ്ൻ പ്രോസിക്യൂട്ടർ ജനറൽ ഇറീന വെനഡിക്ടോവ പറഞ്ഞു. അതേസമയം പ്രസിഡന്റ് വൊളോഡിമിർ സെലെൻസ്കി സംഭവത്തെ വംശഹത്യയെന്നാണ് വിശേഷിപ്പിച്ചത്.
ആരോപണം നിഷേധിച്ച റഷ്യൻ പ്രതിരോധ മന്ത്രാലയം ഇവ മറ്റൊരു പ്രകോപനമാണെന്ന് പ്രതികരിച്ചു. കീവ് നഗരത്തിൽ പൂർണമായ ആധിപത്യം തങ്ങൾ വീണ്ടെടുത്തെന്നാണ് യുക്രൈൻ പറയുന്നത്. ബുച്ചയുൾപ്പെടെ കീവിന്റെ സമീപമേഖലകളിൽ നിന്നു റഷ്യ പിന്മാറിയെന്ന് റിപ്പോർട്ടുണ്ട്. യുക്രൈന്റെ തെക്കൻ, കിഴക്കൻ മേഖലകളിൽ ശ്രദ്ധ കേന്ദ്രീകരിക്കാനാണിതെന്നു കരുതുന്നു.
