തിരുവനന്തപുരം : കൊവിഡ് അതിവ്യാപനത്തിന്റെ പശ്ചാത്തലത്തില് സംസ്ഥാനത്ത് ഇന്ന് കൂടുതല് നിയന്ത്രണം കൊണ്ട് വരും. വൈകുന്നേരം അഞ്ചിന് മുഖ്യമന്ത്രിയുടെ നേതൃത്വത്തില് ചേരുന്ന കൊവിഡ് അവലോകന യോഗമാണ് അന്തിമ തീരുമാനം എടുക്കുന്നത്. കോളേജുകള് അടച്ചിട്ടേക്കും. പൊതു സ്ഥലങ്ങളില് ആള്ക്കൂട്ടം പരമാവധി കുറയ്ക്കാനുള്ള നടപടികള് വന്നേക്കും. വിവാഹത്തിലും മരണാനന്തര ചടങ്ങിലും പങ്കെടുക്കുന്നവരുടെ എണ്ണം 50ല് നിന്ന് കുറച്ചേക്കും. വാരാന്ത്യ നിയന്ത്രണവും രാത്രി കര്ഫ്യൂവും സജീവ പരിഗണനയിലുണ്ട്. നിയന്ത്രണം കടുപ്പിക്കുമ്പോഴും സമ്പൂര്ണ അടച്ചു പൂട്ടല് ഉണ്ടാകില്ലെന്നാണ് വ്യക്തമാകുന്നത്. സംസ്ഥാനത്ത് പ്രതിദിന കൊവിഡ് ബാധിതരുടെ എണ്ണം അരലക്ഷം കടന്നേക്കുമെന്ന് മുന്നറിയിപ്പ് വന്നതോടെ നിയന്ത്രണങ്ങള് കടുപ്പിക്കാന് തന്നെയാണ് സര്ക്കാരിന്റെ തീരുമാനം. ടെസ്റ്റ് പോസിറ്റിവിറ്റി നിരക്ക് 5 0ശതമാനത്തിനും മേല് പോകാനും സാധ്യതയേറിയിട്ടുള്ള അവസ്ഥയാണിപ്പോള്. കോഴിക്കോട് മെഡിക്കല് കോളജ് ആശുപത്രി അടക്കം ആശുപത്രികള് പലതും രോഗികളാല് നിറഞ്ഞത് ചികിത്സയിലും പ്രതിസന്ധി ഉണ്ടാക്കുന്നുണ്ട്.
വരാനിരിക്കുന്നത് ഒമിക്രോണ് സാമൂഹിക വ്യാപനത്തിന്റെ പ്രതിഫലനമാണെന്നാണ് ആരോഗ്യ വിദഗ്ധര് മുന്നറിയിപ്പ് നല്കുന്നത്. രോഗികളുടെ എണ്ണം കൂടുന്നതില് മാത്രമല്ല ആശങ്കയുള്ളത്. ആശുപത്രികളില് പ്രവേശിപ്പിക്കപ്പെടുന്ന രോഗികളുടെ എണ്ണം കൂടുന്നതാണ് പ്രതിസന്ധി. ഇപ്പോള് തന്നെ കോഴിക്കോട് അടക്കം മെഡിക്കല് കോളജ് ആശുപത്രി രോഗികളാല് നിറഞ്ഞു. തിരുവനന്തപുരത്ത് കിടത്തി ചികിത്സയിലുള്ള രോഗികളുടെ എണ്ണവും കൂടുന്നുണ്ട്. കൊവിഡിനൊപ്പം മറ്റ് ചെറിയ ആരോഗ്യപ്രശ്നങ്ങളും ഉള്ളവരെയെല്ലാം താഴേത്തട്ടിലുള്ള ആശുപത്രികള് മെഡിക്കല് കോളജ് ആശുപത്രികളിലേക്ക് റഫര് ചെയ്യുകയാണ്. സി കാറ്റഗറി അതായത് ഗുരുതരാവസ്ഥയിലുള്ള രോഗികളെ മാത്രം മെഡിക്കല് കോളജ് ആശുപത്രികളിലേക്ക് റഫര് ചെയ്താല് മതിയെന്ന് നിര്ദേശം നല്കണമെന്ന് മെഡിക്കല് കോളജ് ആശുപത്രി അധികൃതര് സര്ക്കാരിനെ അറിയിച്ചിട്ടുണ്ട്. നിലവില് രോഗം സ്ഥിരീകരിച്ച് ചികിത്സയിലുള്ള രോഗികളുടെ എണ്ണത്തില് മുന് ആഴ്ചയുമായി താരതമ്യം ചെയ്യുമ്പോള് 192 ശതമാനമാണ് ആവര്ധന. ആരോഗ്യവകുപ്പ് പ്രതീക്ഷിച്ചതിലും ഇരട്ടിയാണ് ഈ സംഖ്യ.
ഒമിക്രോണ് സാമൂഹിക വ്യാപനം നടന്നു കഴിഞ്ഞതിനാല് വരും ദിവസങ്ങളില് കൂടുതല് രോഗികള് ആശുപത്രികളിലെത്തുമെന്നുറപ്പ്. താഴേത്തട്ടിലുള്ള ആശുപത്രികളിലെ കൊവിഡ് ചികിത്സയും രണ്ടാം തരംഗത്തിന്റെ തുടക്കത്തില് ഉണ്ടായിരുന്നത് പോലെ സിഎഫ്എല്ടിസികളും വ്യാപകമാകമാക്കിയില്ലെങ്കില് മെഡിക്കല് കോളജ് ആശുപത്രികളുടെ പ്രവര്ത്തനം താറുമാറാകും. നിലവില് കൊവിഡിതര ചികിത്സകള്ക്ക് നിയന്ത്രണം ഏര്പ്പെടുത്താനും ആലോചനയുണ്ട്.
