മുംബൈ: ഭർതൃപിതാവിന്റെ മുറിക്ക് തീകൊളുത്തി യുവതി. യുവതി ബോധപൂർവം ഭർതൃപിതാവ് ഉറങ്ങുന്ന മുറിയിലേക്ക് തീയെറിയാൻ ശ്രമിക്കുന്നതിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്.
പേപ്പർ പോലുള്ള വസ്തു കത്തിച്ച ശേഷം പ്രായമായ ഭർതൃപിതാവിന്റെ മുറിയിലേക്ക് വലിച്ചെറിയുന്നതിന്റെ ദൃശ്യങ്ങളാണ് സമൂഹമാധ്യമങ്ങളിൽ വ്യാപകമായി പ്രചരിക്കുന്നത്. തീ കത്തിയ വസ്തു മുറിയിലേക്ക് എറിഞ്ഞതിന് പിന്നാലെ ദൃശ്യങ്ങൾ പകർത്തുകയായിരുന്ന വ്യക്തി കട്ടിലിൽ നിന്നും ഇത് മാറ്റിയതിനാൽ അപകടം ഒഴിവായി. ‘സ്ത്രീ പിതാവിനെ കത്തിക്കാൻ പോവുകയാണ്’ എന്ന് വീഡിയോ ചിത്രീകരിക്കുന്ന വ്യക്തി പറയുന്നതും ദൃശ്യങ്ങളിൽ കേൾക്കാം.
നിരവധി പേരാണ് ദൃശ്യങ്ങൾ പങ്കുവെച്ചും യുവതിയെ വിമർശിച്ചും രംഗത്തെത്തിയത്. യുവതി എന്തോ കാരണത്താൽ അസ്വസ്ഥയായിരുന്നുവെന്നും അതിനാൽ പിതാവിനെ കത്തിക്കാൻ ശ്രമിക്കുകയായിരുന്നുവെന്നുമാണ് ചില ഉപയോക്താക്കളുടെ വാദം. ഇത്തരം ക്രൂര സംഭവങ്ങൾ കൂടി ചിത്രീകരിക്കാൻ മൊബൈലുകൾ ഉള്ളത് നല്ലതാണെന്നും ചിലർ എക്സിൽ കുറിച്ചു.
