കൊച്ചി: നായരമ്പലത്ത് യുവതിയും മകനും പൊള്ളലേറ്റ് മരിച്ച സംഭവത്തിൽ പോലീസിനെതിരെ ഗുരുതര ആരോപണവുമായി മരിച്ച സിന്ധുവിന്റെ അമ്മ. കസ്റ്റഡിയിലായ അയൽവാസി ഒരു വർഷമായി ദിലീപ് സിന്ധുവിനെ ശല്യം ചെയ്തിരുന്നു. പോലീസിൽ പരാതി നൽകിയെങ്കിലും അവഗണിച്ചുവെന്നും അമ്മ സബയത്ത് പറഞ്ഞു. ഒരു തവണ മകളെ ദിലീപ് കയറിപ്പിടിച്ചു. മകൻ അതുലിന്റെ ഭാവി ഓർത്താണ് സിന്ധു ഇതെല്ലാം പുറത്തു പറയാതിരുന്നതെന്നും സിന്ധുവിന്റെ അമ്മ പറഞ്ഞു. നായരമ്പലം തയ്യെഴുത്തുവഴി കിഴക്ക് തെറ്റയില് പരേതനായ സാജുവിന്റെ ഭാര്യ സിന്ധുവും (42) മകന് അതുലുമാണ് (17) ദുരൂഹ സാഹചര്യത്തിൽ പൊള്ളലേറ്റ് മരിച്ചത്. സംഭവത്തിൽ അയൽവാസിയായ യുവാവിനെ പോലീസ് ചോദ്യം ചെയ്തുവരികയാണ്.
ഞായറാഴ്ച പുലര്ച്ച ആറിനാണ് സംഭവം. വീട്ടില് നിന്ന് പുക ഉയരുന്നതുകണ്ട് അടുത്ത് താമസിക്കുന്ന ബന്ധുക്കളും നാട്ടുകാരും വാതില് ചവിട്ടിപ്പൊളിച്ച് അകത്ത് കടക്കുകയായിരുന്നു. ഗുരുതര പൊള്ളലേറ്റ ഇരുവരെയും ഉടന് ആശുപത്രിയിലെത്തിച്ചെങ്കിലും സിന്ധു മരിച്ചു. ആംബുലന്സില് ആശുപത്രിയില് കൊണ്ടുപോകുംവഴി മരണവെപ്രാളത്തില് കരഞ്ഞ വീട്ടമ്മ സമീപവാസിയായ യുവാവിന്റെ പേരുപറയുന്ന വോയ്സ് ക്ലിപ്പ് ബന്ധുക്കള് പോലീസില് ഹാജരാക്കി. ഇയാള് ശല്യം ചെയ്യുന്നുവെന്നാരോപിച്ച് ദിവസങ്ങൾക്കുമുമ്പ് വീട്ടമ്മ പോലീസില് പരാതി നല്കിയിരുന്നു.
