ദുബായ്: പി.സി.ജോർജ് തനിക്കെതിരെ നടത്തിയ പരാമർശങ്ങൾ ശരിയോ തെറ്റോ എന്നു തിരിച്ചറിയാൻ മലയാളികൾക്കു കഴിവുണ്ടെന്നു ലുലു ഗ്രൂപ്പ് ചെയർമാൻ എം.എ.യൂസഫലി പറഞ്ഞു. സംസ്കാര സമ്പന്നരാണു മലയാളികൾ. സത്യം തിരിച്ചറിയാൻ അവർക്കു കഴിയും. ജോർജ് പ്രസ്താവന തിരുത്തിയതിനാൽ കൂടുതൽ പ്രതികരിക്കാനില്ലെന്നും അദ്ദേഹം വ്യക്തമാക്കി.
പല രാജ്യക്കാരും പല മതസ്ഥരും ലുലുവിൽ ജോലി ചെയ്യുന്നുണ്ട്. മലപ്പുറം പെരിന്തൽമണ്ണ ഉൾപ്പടെയുള്ള ഇടങ്ങളിൽ ലുലു ഹൈപ്പർമാർക്കറ്റ് വരും. ഇന്ത്യയിൽ ഒഴികെ അടുത്തവർഷത്തോടെ ഐപിഒ ഇറക്കാൻ സജ്ജമാകുകയാണ്.യെമനിൽ തടവിൽ കഴിയുന്ന നിമിഷപ്രിയയുടെ മോചനത്തിനായി കഴിഞ്ഞദിവസവും ചർച്ച നടത്തിയെന്നും മോചനം സാധ്യമാകുമെന്നാണ് പ്രതീക്ഷയെന്നും യൂസഫലി പറഞ്ഞു.
