തൊടുപുഴ∙ വന്‍ തുകയുടെ ബിൽ നല്‍കി വൈദ്യുതി ഉപഭോക്താക്കള്‍ക്ക് കെഎസ്ഇബിയുടെ ഷോക്ക് ട്രീറ്റ്‌മെന്റ്. പതിവായി അടച്ചിരുന്ന ബില്‍തുകയുടെ പത്തു മടങ്ങിലേറെ വര്‍ധനവാണ് പലര്‍ക്കും ലഭിച്ച പുതിയ ബില്ലില്‍ രേഖപ്പെടുത്തിയിരിക്കുന്നത്. ശരാശരി 2000-2500 രൂപ കണക്കില്‍ ബില്‍ അടച്ചിരുന്ന ഗാര്‍ഹിക ഉപഭോക്താക്കള്‍ പുതിയ ബിൽ കണ്ടപ്പോള്‍ ശരിക്കും ഞെട്ടി. 30,000 മുതല്‍ 60,000 രൂപ വരെയാണ് പലര്‍ക്കും ലഭിച്ചത്.തൊടുപുഴ ടൗണില്‍ താമസിക്കുന്ന മണര്‍കാട്ട് സണ്ണി സെബാസ്റ്റ്യന്‍ നേരത്തെ വൈദ്യുതി ചാര്‍ജിനത്തില്‍ അടച്ചിരുന്നത് 2200 – 2666 രൂപ നിരക്കിലായിരുന്നു. എന്നാല്‍ പുതിയ മീറ്റര്‍ റീഡിങ് കഴിഞ്ഞപ്പോള്‍ ബില്‍ 60,611 ആയി വര്‍ധിച്ചു. 53,550 രൂപ എനര്‍ജി ചാര്‍ജും 5355 രൂപ നികുതിയും ഉള്‍പ്പെടെയാണ് 60,611 രൂപ ബില്ലില്‍ രേഖപ്പെടുത്തിയിരിക്കുന്നത്. 1700 – 2000 രൂപ കണക്കില്‍ വൈദ്യുതി ചാര്‍ജ് അടച്ചിരുന്ന മുളയ്ക്കല്‍ എം.എസ്.പവനന് 33,705 രൂപയാണ് ഇത്തവണ ലഭിച്ച വൈദ്യുതി ബിൽ. ഇവരുടെ വീടുകളില്‍ താമസിക്കുന്നത് മൂന്നംഗങ്ങള്‍ മാത്രമാണ്. എസി പോലും ഉപയോഗിക്കാത്തവര്‍ക്കാണ് ഇത്തരത്തില്‍ വന്‍ തുകയുടെ ബിൽ ലഭിച്ചത്.
കനത്ത ബില്ലിനെ സംബന്ധിച്ച് കെഎസ്ഇബി ഓഫിസില്‍ ചോദിച്ചപ്പോള്‍ മറുപടിയും വിചിത്രമായിരുന്നു. നേരത്തെയെടുത്ത മീറ്റര്‍ റീഡിങ്ങുകൾ തെറ്റായിരുന്നെന്നും ഇപ്പോള്‍ എടുത്തതാണു ശരിയായ റീഡിങ്ങെന്നും ഇതാണ് കൃത്യമായ ബില്ലെന്നുമായിരുന്നു ഇവരുടെ മറുപടി. ഇത്തരത്തില്‍ ഒട്ടേറെ ഉപഭോക്താക്കള്‍ക്ക് വൻ തുകയുടെ ബിൽ ലഭിച്ചിട്ടുണ്ട്.
ഇതിനിടെ, വലിയ ബിൽ ലഭിച്ച ഉപഭോക്താക്കള്‍ കെഎസ്ഇബി അസിസ്റ്റന്റ് എന്‍ജിനീയറെ സമീപിച്ച് പരാതി നൽകി. സംഭവത്തില്‍ ഉത്തരവാദികളായ രണ്ടുപേരെ സസ്‌പെന്‍ഡ് ചെയ്തിട്ടുണ്ടെന്നും വിജിലന്‍സ് അന്വേഷണം ആരംഭിച്ചിട്ടുണ്ടെന്നുമായിരുന്നു എഇ നല്‍കിയ വിശദീകരണം. എന്നാല്‍ കനത്ത ബില്‍ തിരുത്താനുള്ള നടപടികള്‍ സംബന്ധിച്ച് വ്യക്തതയൊന്നുമില്ല. വന്‍ തുക ബില്ലായി ലഭിച്ച ഉപഭോക്താക്കള്‍ ഇക്കാര്യത്തില്‍ കെഎസ്ഇബി ഓംബുഡ്‌സ്മാനെ സമീപിക്കാന്‍ ഒരുങ്ങുകയാണ്.
