പാലാ > ബൈക്കിൽ കെഎസ്ആർടിസി ബസിടിച്ച് ദമ്പതികൾ മരിച്ചു. വലവൂർ പാറയിൽ പി എൻ രാജൻ(54), ഭാര്യ സീത(52) എന്നിവരാണ് മരിച്ചത്. പാലാ- ഉഴവൂർ റോഡിൽ പേണ്ടാനംവയലിൽ ബുധൻ പകൽ രണ്ടിനാണ് അപകടം. പാലാ ജനറൽ ആശുപത്രിയിലെത്തി മരുന്ന് വാങ്ങി മടങ്ങുകയായിരുന്നു ഇരുവരും. പേണ്ടാനംവയലിലെ ഹോട്ടലിൽ ഭക്ഷണം കഴിക്കാനിറങ്ങി തിരക്കായതിനാൽ തിരികെ പോകാൻ ബൈക്ക് തിരിക്കുമ്പോൾ തൃശൂരിൽനിന്ന് പാലായ്ക്ക് വന്ന കെഎസ്ആർടിസി ഫാസ്റ്റ് പാസഞ്ചർ ഇടിക്കുകയായിരുന്നു.
ബസിന്റെ മുൻചക്രത്തിന് ഇടയിൽ കുടുങ്ങിയ ദമ്പതിമാരുമായി 10 മീറ്ററോളം നീങ്ങിയ ശേഷമാണ് ബസ് നിർത്താനായത്. ഏറെ പണിപ്പെട്ട് ഇരുവരെയും പുറത്തെടുത്ത് ആശുപത്രിയിലെത്തിച്ചെങ്കിലും മരിച്ചു. ഇരുവരുടെയും സംസ്കാരം വ്യാഴം പകൽ 3.30ന് വീട്ടുവളപ്പിൽ. രാജൻ വലവൂർ ആർപിഎസ് ജങ്ഷനിൽ തട്ടുകട നടത്തുകയാണ്. സീത പാലായിലെ സ്വകാര്യ കണ്ണാശുപത്രിയിലെ ജീവനക്കാരിയാണ്. വലവൂർ കൊങ്ങിണിക്കാട്ടിൽ കുടുംബാംഗമാണ്. മകൻ രാഹുൽ ഏഴ് വർഷം മുമ്പുണ്ടായ ബൈക്കപകടത്തിൽ മരിച്ചു. മകൾ: രോഹിണി(കോയമ്പത്തൂർ).
