ഭരത്‌പുർ > രാജസ്ഥാനിലെ ഭരത്പൂരിൽനിന്ന് തട്ടിക്കൊണ്ടുപോയ നാസിർ (27), ജുനൈദ് (35) എന്നിവരെ ഹരിയാനയിലെ ഭീവാനിയിൽ വാഹനത്തിൽ ചുട്ടുകൊന്ന നിലയിൽ കണ്ടെത്തി. ബജ്റങ്ദൾ പ്രവർത്തകരായ പശുസംരക്ഷക ഗുണ്ടകളാണ് കൊലപാതകത്തിന് പിന്നിലെന്ന് കൊല്ലപ്പെട്ടവരുടെ ബന്ധുക്കൾ ആരോപിച്ചു. അഞ്ച് പേർക്കെതിരെ തട്ടിക്കൊണ്ടുപോകലിന് കേസെടുത്തു.
ഹരിയാനയിലെ ഭിവാനി ജില്ലയിൽ വ്യാഴാഴ്‌ച രാവിലെയാണ് മഹീന്ദ്ര ബൊലേറോ എസ്‌യുവിയിൽ നസീറിന്റെയും ജുനൈദിന്റെയും കത്തിക്കരിഞ്ഞ മൃതദേഹം കണ്ടെത്തിയത്. ഇരുവരും ജീവനോടെ വെന്തുമരിച്ചതാണോ അതോ കാറിനുണ്ടായ തീപിടിത്തത്തിൽ മരിച്ചതാണോ എന്ന് അന്വേഷിക്കുന്നുണ്ട്. തട്ടിക്കൊണ്ടുപോയ രണ്ട് പേരുടെയും കുടുംബങ്ങൾ വാഹനം തിരിച്ചറിഞ്ഞു, കാറിന്റെ ഉടമ നസീറിനെയും ജുനൈദിനെയും അറിയാമെന്നും പറഞ്ഞു.
പശു സംരക്ഷകർക്ക് മരണത്തിൽ പങ്കുണ്ടോയെന്ന് അന്വേഷിച്ച് വരികയാണെന്ന് പൊലീസ് പറഞ്ഞു. ജുനൈദിനെതിരെ പശുക്കടത്ത് നടത്തിയതിന് അഞ്ച് കേസുകളുണ്ടെന്നും നസീറിന് ക്രിമിനൽ റെക്കോർഡ് ഇല്ലെന്നും ഭരത്‌പുർ ഐജി ശ്രീവാസ്‌തവ പറഞ്ഞു.
